Minkunga 95 - Nkanda Wu Moyo Nguizani yimona ayi minkunga

Minkunga 95 Niandi simbidi nza mu mioko miandi.

¹ Yizanu, bika tuyimbidila Yave mu khini. Bika tuyamikina kuidi ditadi di phulusu eto.

² Bika tuizanu ku ntualꞌandi mu vana matondo tunyayisa mu miziki ayi mu minkunga.

³ Bila Yave widi Nzambi yinneni, ntinu wunneni va yilu zinzambi zioso.

⁴ Va koko kuandi muidi vadi phinda zi ntoto zitsongi zi miongo zivuiwulu kuidi niandi.

⁵ Mbu wandi bila niandi veka wuvanga wawu ayi mioko miandi mivanga ntoto wu yuma.

⁶ Yizanu bika tukikulula mu buongama, bika tufukamanu va ntuala Yave mvangi eto.

⁷ Bila niandi Nzambi eto ayi beto tuidi batu bandi keta dikila, nkangu mamemi mu ku tsi lukebolo luandi. Enati lumbu kiaku luwilu mbembo andi,

⁸ lubika kitula mintima mieno ngolo banga bu luvangila Meliba, banga bu luvangila mu lumbu ki Masa mu dikanga ;

⁹ Kuna madise beno bathotila ayi batsokila ; ka diambu ko bamona momo ndivanga.

¹⁰ Mu makumaya ma mimvu, ndiba mu nganzi kuidi tsungi yina ; ndituba : “badi batu badi mintima mizimbila ayi basia zaba zinzila ziama ko.”

¹¹ Diawu ndizengila ndefi ku tsi nganzi ama : “balendi kota ko mu luvundulu luama.”