Minkunga 90 - Nkanda Wu Moyo Nguizani yimona ayi minkunga

BUKU YI NYA Minkunga 90 Wutulonga mu tanga bilumbu bieto

Lusambulu lu Moyize, mutu Nzambi.

¹ Yave, ngeyo wuba buangu kieto kivuanda mu tsungi ka tsungi.

² Tuamina miongo mibutuka voti tuamina wuvanga ntoto ayi nza ; tona mu thangu ka thangu, ngeyo widi Nzambi.

³ Ngeyo wumvutulanga batu mu fundu-fundu bu weti tuba : “Vutuka mu fundu-fundu, e e bana ba batu.”

⁴ Bila va meso maku mili di mimvu midedikini banga lumbu kimosi kiviokidi zono ; voti banga thangu yimosi va builu,

⁵ ngeyo weti botula batu mu tulu tu lufua, badi banga biti bimona va nsuka.

⁶ Va nsuka bimenini bimona, va masika bilebukidi ayi biyumini.

⁷ Tulembo lalakana mu diambu di nganzi aku ayi tsisi tulembo moni mu diambu di miangu miaku.

⁸ Ngeyo wutudidi mambimbi meto va ntualꞌaku, masumu meto masuama va ntuala kiezila ki zizi kiaku.

⁹ Bilumbu bieto bioso bilembo mani ku tsi nganzi aku ; tulembo manisa mimvu mieto ayi luniongo.

¹⁰ Tezo ki bilumbu bieto kidi ki lusambudi lumimvu voti lunana enati ngolo zidi yeto. Sina kiawu kidi kaki kiphasi ayi kimianga. Bila luzingu lueti lulembo vioki nsualu ayi tulembo yendi.

¹¹ Nani zebi lulendo lu nganzi aku e ? Muingi miangu miaku miba tola banga lukinzu lolo fueni tambula.

¹² Wutulongisa tanga bilumbu bieto mu bufuana muingi tubaka ntima wu duenga.

¹³ Bika buela fuema, a Yave. Nate thangu mbi mela bela e ? Bika wumona bisadi biaku kiadi.

¹⁴ Mu nsuka, bika wutuyukutisa mu luzolo luaku lu ngolo ; buna tuela yimbilanga mu khini ayi buna tuela yangalala mu bilumbu bioso.

¹⁵ Wutuyangidikanga boso buididi bilumbu biobi wutumonisina phasi boso buididi mimvu miomi tuyamusunu.

¹⁶ Bika mavanga maku mamonoso kuidi bisadi biaku ; kiezila kiaku kuidi bana bawu.

¹⁷ Bika nlemvo wu Yave, Nzambi eto wubanga va beto, bika mu diambu dieto, wukindisa kisalu ki mioko mieto. Nyinga, kindisa kisalu ki mioko mieto.