Minkunga 84 - Nkanda Wu Moyo Nguizani yimona ayi minkunga

Minkunga 84 Phuila yi nzo aku ndidi

Nkunga wu bana ba Kole kuidi pfumu minyimbidi ; bayimbidila mu ngitale yi basi Ngati.

¹ A phila lueki luidi mu buangu kiaku kioki weti vuanda ! A Nzambi, nkua ngolo yoso.

² Muelꞌama phuila widi ayi wulembo suki-suki mu diambu di luphangu lu Yave. Ntimꞌama ayi nsuni ama bilembo yamikina mu diambu di Nzambi yi moyo.

³ Ka diambu ko dikuanga beki nzoꞌandi, ayi tsiodila mamvandi beki dianza diandi koko keti lundila bana bandi… buangu kifikimini ntalꞌaku A Yave nkua ngolo yoso, Ntinu ama ayi Nzambi ama !

⁴ Lusakumunu kuidi bobo beti vuanda mu Nzo aku ! Beti kuzitisa mu zithangu zioso.

⁵ Lusakumunu kuidi batu bobo zingolo ziawu zidi mu ngeyo ; bobo bakubika mintima miawu mu kuenda sambila ku Yelusalemi.

⁶ Bu bamviokanga mu ndimba wu Baka, buna beti kuwukitula buangu ki zitho zi minlangu ; mvula mamvandi wufukidila wawu mu bibuindi.

⁷ Zingolo ziawu zieti buelama nate kadika mutu kammonika va ntuala Nzambi yi sioni.

⁸ Wa lusambulu luama, a Yave, Nzambi nkua ngolo yoso, wundimba Nzambi yi Yakobi.

⁹ Tala nkaku eto, a Nzambi Tadila mu nlemvo mutu aku wuvinda mafuta.

¹⁰ Lumbu kimosi mu luphangu luaku kiviokidi mili di bilumbu kunkaka. Thidi kuama ba nsungi wu muelo mu nzo yi Nzambi ama ayi mu vuandanga mu zinzo zi ngoto zi batu bambimbi.

¹¹ Bila Yave Nzambi niandi thangu ayi nkaku, Yave wela vana nlemvo ayi nzitusu, kadi kima kimosi kimboti kalendi yimina ko bobo bandiatilanga mu kambu tsembolo.

¹² A Yave nkua ngolo yoso ! Lusakumunu kuidi mutu wowo weti tula diana diandi mu ngeyo !