Minkunga 8 - Nkanda Wu Moyo Nguizani yimona ayi minkunga

Minkunga 8 Bunneni bu Nzambi ayi bunneni bu mutu

Nkunga Davidi kuidi pfumu minyimbidi mu ngitala yi basi Ngati.

¹ Yave, Pfumu eto ! Tala buevi dizina diaku didi di nzitusu va ntoto wumvimba. Ngeyo wutula nkemboꞌaku viokila diyilu.

² Mu bididi bi bana balezi ayi bi bana batsombi, ngeyo wutuma mu totukila nzitusu mu diambu di bambeni ziaku ; mu diambu di kanga miunu mi bobo beti ku lenda, ayi mutu wowo wumvutulanga mambimbi mu mambimbi.

³ Bu ndieti tala diyilu diaku, kisalu ki minlembo miaku, ngonda ayi zimbuetete ziozi wutula va buangu ;

⁴ buna mbi biobi mutu mu diambu wuntebukilanga moyo, ayi muana mutu mu diambu wumbelanga mayindu e ?

⁵ Ngeyo wumvanga kaba fioti ku tsi bivangu bi diyilu ayi ngeyo wumvuika nkembo ayi nzitusu,

⁶ Ngeyo wunkitula nyadi mu bisalu bi mioko miaku, ngeyo wutula bima bioso ku tsi malu mandi :

⁷ mamemi moso ayi zingombi zioso ; bibulu bioso binsitu,

⁸ zinuni zi yilu ayi zimbizi zi mbu, bibioso bindiatilanga mu minsolo mi mbu.

⁹ A Yave, Pfumu eto ! Tala buevi dizina diaku didi di nzitusu va ntoto wumvimba.