Minkunga 76 - Nkanda Wu Moyo Nguizani yimona ayi minkunga

Minkunga 76 Nzambi niandi vuidi ndungunu

Nkunga Asafi kuidi pfumu minyimbidi kayimbidila mu ngitala.

¹ Mu Yuda, Nzambi zabikini Dizina diandi didi dinneni mu Iseli.

² Nzo andi yi ngoto yidi ku Salemi, buangu kiandi kidi ku Sioni.

³ Kuna kakeludila madionga malembo lemi, nkaku ayi sabala, mbedi ayi binuanunu bi mvita.

⁴ Ngeyo lembo lezama mu kiezila, lutidi kinzuku viokila miongo miwedi bibulu.

⁵ Makhesa mamana ku baziona bima, balembo leki tulu tuawu tutsuka, kadi wumosi mu binuani lenda tombula mioko miandi.

⁶ Mu themunuꞌaku, a Nzambi yi Yakobi, ziphunda ayi matoma ma mvita bibibiodi biledi tulu tuvindu. Bileka tulu tuvindu.

⁷ Ngeyo veka, lembo monisa tsisi ! Nani wulenda telama va meso maku ngeyo fuema e ?

⁸ Tona kuna Diyilu wuwakikisa nzengolo ; ntoto wumona tsisi ayi wutumbu dingalala ;

⁹ Thangu ngeyo, a Nzambi, wutelama mu diambu di sambisa ayi mu diambu di vukisa bankwa ziphasi va ntoto.

¹⁰ Bukiedika nganzi aku kuidi batu yinnatini nzitusu ; ayi bobo bavukidi mu nganzi aku, badi basimbudulu.

¹¹ Tambikanu zikhanu kuidi Yave Nzambi eno ayi dedikisanu ziawu ! Bika baboso badi mu nzunga ki mintoto, banata bakaba kuidi mutu wowo widi tsisi.

¹² Niandi weti bula phevi minyadi, niandi tsisi beta kummona kuidi mintinu mi ntoto.