Minkunga 64 - Nkanda Wu Moyo Nguizani yimona ayi minkunga

Minkunga 64 Wukheba

Nkunga Davidi kuidi pfumu minyimbidi.

¹ Wungwa, a Nzambi, bu ndilembo wakikisa maniongo mama keba luzingu luama va ntuala mbeni yoyi ndieti mona tsisi !

² Wutsueka mu zikhanu zintotukilanga mu lukutukunu lu nsueki lu batu bambimbi ayi mu lukutukunu lu nkangu wu batu bamvanganga mambimbi ; bobo badi bulawu.

³ Balembo bengula ludimi luawu banga sabala ; bantotulanga mambu mawu banga madionga meti vonda.

⁴ Beti lozila bu badi mu bibuangu bisuama mutu kambulu zaba diambu Beti kunlozila mu kinzimbukila, mu kambu mona tsisi.

⁵ Beti kukikindisa mu zikhanu zimbimbi ; beti tubana mu diambu di batamba mintambu miawu, Beti kamba : “A nani wela mimona e ?”

⁶ Beti yindula mambu makambulu masonga ayi beti tuba : “Tukubikidi lukanu lu fuana.” Bukiedika, mayindu ma tsi ntima ayi ntima wu mutu thipula bidi.

⁷ Vayi Nzambi wela kuba lozila madionga mandi mu kinzimbukila bela.

⁸ Wela balula ludimi luawu veka mu diambu diawu ayi kuba nata ku mbivusu babo bela kuba mona bela nikuna ntu.

⁹ Batu boso bela mona tsisi, bela yamikisa mavanga ma Nzambi ; ayi bela sudika momo kavanga.

¹⁰ Bika mutu wusonga kamona khini mu Yave ayi katombila suamunu mu niandi ayi babo badi mintima mi lulama banzitisa.