Minkunga 63 - Nkanda Wu Moyo Nguizani yimona ayi minkunga

Minkunga 63 Mamboti maku maviatukidi luzingu

Nkunga Davidi mu thangu kaba mu dikanga di Yuda.

¹ A Nzambi ! Ngeyo widi Nzambiꞌama, mu kiedika ngeyo ndintomba ; muelꞌama wulembo moni phuila yi ngeyo ; nitu ama tsatu yidi mu kumona mu tsi yi yuma ; yibiva ; yikondolo nlangu ;

² Ndimmona mu buangu kinlongo ndimona lulendo luaku ayi nkembo aku.

³ Bila luzolo luaku luviatukidi luzingu ; bididi biama biela kukembisa.

⁴ Ndiela kuzitisa thangu yoso ndidi moyo. Mu diambu di dizina diaku, ndiela vumuna mioko miama ku yilu.

⁵ Muelꞌama wela yukuta banga kimvuama kiwombo ki bidia mu minkunga bididi bi munu ama biela kuzitisa.

⁶ Va mbukꞌama ndikutebukilanga moyo ndieti kuyindula builu bu mvimba.

⁷ Bila ngeyo lusadusu luama, ayi ndilembo yimbila ku tsi kitsusula ki mavavi maku.

⁸ Muelꞌama widi wukangama mu ngeyo ; ayi koko kuaku kulubakala kueti kukhindisa.

⁹ Bobo beti tomba luzingu luama bela bungana ; bela kota kuna tsi ntoto.

¹⁰ Bela kuba yekula mu lulendo lu sabala ; bela kituka bidia bi zimbua zi nsitu.

¹¹ Vayi Ntinu wela mona khini mu Nzambi ; baboso bobo banleva ndefi mu dizina di Nzambi bela kunzitisa. Bila miunu mi bankua luvunu miela kangama.