Minkunga 61 - Nkanda Wu Moyo Nguizani yimona ayi minkunga

Minkunga 61 Wutsueka ku tsi mavevi maku

Nkunga Davidi kuidi pfumu minyimbidi ; kayimbidila mu lusinga.

¹ Wa yamikina kuama, e Nzambi tamba dikutu mulusambulu luama

² Tona kusukinina ntoto, ngeyo ndintela ; nditela bu ntimꞌama wumevonga ngolo ; wundati va mbata dibanga diodi dindutidi mu nangama.

³ Bila ngeyo wuba suamunu kiama ; ngeyo wuba nzo yizangama ayi yingolo va ntuala mutu weti kundenda.

⁴ Ndiela zingila mu nzo aku yi ngoto ; mu zithangu zioso ayi ndiela suamina ku tsi mavavi maku.

⁵ Bila ngeyo, wuwa zikhanu ziama, e Nzambi ; ngeyo wuphana kiuka ki batu bobo beti kinzika dizina diaku.

⁶ Buela bilumbu bi luzingu lu ntinu, mimvu miandi mu diambu di zitsungu ziwombo.

⁷ Bika kavuanda va kundu ki kipfumu va meso ma Nzambi mu zithangu zioso ; tula luzolo luaku ayi kikhuikizi kiaku mu kunkeba.

⁸ Buna ndiela yimbidila nzitusu mu diambu di dizina diaku mu zithangu zioso ayi ndiela dedikisa zikhanu ziama lumbu ka lumbu.