Minkunga 53 - Nkanda Wu Moyo Nguizani yimona ayi minkunga

Minkunga 53 Beto boso tuidi bazimbala

Nkunga Davidi kuidi pfumu minyimbidi ; kayimbidila mu flute.

¹ Nkua buvulu wuntubanga mu ntimꞌandi : “kuisiko Nzambi.” Bakibivisidi, zinzila ziawu zidi zimbimbi ; kuisiko mutu wumvanganga mamboti.

² Nzambi, wulembo tadi tona ku Diyilu bana ba batu mu diambu di tala kani valenda ba batu balenda sudika ; bobo bantomba Nzambi.

³ Batu boso bamana zimbala, bamana kibivisa va kimosi. Kuisiko kadi wumosi wumvanganga mamboti, kadi kuandi wumosi.

⁴ Bobo bamvanganga mambimbi, basudikanga ko e ? Bawu balembo dia batu bama banga bu beti dila dipha ; ayi batelanga Nzambi ko.

⁵ Kuna batitila mu diambu di tsisi va buangu ki kondolo bila kimonina tsisi ; Nzambi wukosikisa mimvesi mi batu bobo banuanisa ; ngeyo wuba fuisa tsoni bila Nzambi wuba lenza.

⁶ A, enati phulusu yi Iseli yitotukila ku Sioni ! Mu thangu Nzambi kela vutula kiuka ki batu bandi ; bika Yakobi kamona khini ayi Iseli kayangalala.