Minkunga 47 - Nkanda Wu Moyo Nguizani yimona ayi minkunga

Minkunga 47 Lusikila Nzambi zitsiaki

Nkunga bana ba babakala ba Kole kuidi pfumu minyimbidi.

¹ Lusika zitsiaki, beno makanda moso. Luyamikina kuidi Nzambi mu khini,

² Tala phila Yave yizangama kadidi tsisi ! Niandi ntinu wunneni va mbata ntoto wumvimba.

³ Wutula makanda ku tsi buvika bueto, batu ku tsi malu meto.

⁴ Wutusobudila kiuka ; luniemo lu Yakobi ; mutu wu kazola.

⁵ Nzambi wukuma va khatitsika yamikina ku khini Yave wukuma va khatitsika biyoko bi tulumbeta.

⁶ Luyimbila minzitusu kuidi Nzambi Luyimbila minzitusu ; Luyimbila minzitusu kuidi Nzambi eto, luyimbila minzitusu.

⁷ Bila Nzambi niandi ntinu wu ntoto wumvimba ; Lunyimbidila nkunga wu nzitusu.

⁸ Nzambi weti yadila makanda moso. Nzambi vuendi va kundu kiandi kinlongo.

⁹ Batu banneni ba makanda bakutikini banga batu ba Nzambi yi Abalahami bila Nzambi niandi vuidi mintinu mi ntoto. Niandi wuyayusu ngolo.