Minkunga 32 - Nkanda Wu Moyo Nguizani yimona ayi minkunga

Minkunga 32 Khini yidi mu lemvokolo

Nkunga Davidi.

¹ Lusakumunu kuidi mutu wowo wulemvokolo nzimbalꞌandi ; masumu mandi mafukulu.

² Lusakumunu kuidi mutu wowo Yave kankambu ntangila disumu diandi, ayi kambulu bukhita mu pheve andi.

³ Bu ndiba dio sui, mimvesi miama milebakana mu kunga ku ndiba nkunga mu lumbu kimvimba.

⁴ Bila muini ayi builu koko kuaku ziku kuba va minu. Zingolo ziama zisukidi banga mu thangu yi muini wu ngolo.

⁵ Buna ndizabikisa disumu diama, ndisia fuka mambimbi mama ko. Ndituba : “Ndiela lomba nlemvo mu zinzimbala ziama kuidi Yave.” Buna ngeyo wulemvukila mambimbi ma disumu diama.

⁶ Buna diawu bika woso mutu wunkinzikanga mambu maku, wela kusambila mu thangu yoyi kalenda kubakula. Bukiedika mu thangu yi khuka nlangu yingolo milendi kunlalumuna ko.

⁷ Ngeyo buangu kiama kieti kutsueka ; ngeyo weti kukheba mu ziphasi. Ngeyo wukunzungidilanga mu minkunga mi khudulu.

⁸ “Ndiela kumonisa ayi kulonga nzila yoyi fueti diatila, ndiela kuvana ndongi ayi thaluꞌama yela ba vadi ngeyo.

⁹ Kadi ba banga phunda voti banga bulu kioki bantedilanga ‘mule’ ; bibulu bikondolo diela, vayi biobi binkangungu nsinga ayi sengo mu munu bila nganu bilenda fikama va widi.”

¹⁰ Mabienga mawombo madi mu diambu di mutu wumbimbi ; vayi luzolo lu ngolo lu ma Yave lunzungidilanga mutu wowo wuntulanga diana diandi mu niandi.

¹¹ Monanu khini ayi luyangadala mu Yave beno basonga. Luyimbila, beno boso luidi balulama mu mintima.