Minkunga 30 - Nkanda Wu Moyo Nguizani yimona ayi minkunga

Minkunga 30 Ngeyo wuphutudila luzingu

Nkunga Davidi kayimbidila mu mbiekolo nzo Nzambi.

¹ Ndiela kuyayisa, a Yave bila ngeyo wuthotula mu dibulu didi thipula Wusia tia ko ti bambeni ziama zimona khini mu diambu diama.

² A Yave, Nzambi ama, ngeyo nditela mu diambu di lusadusu ayi ngeyo wumbelusa.

³ Yave, ngeyo wuthotula mu tsi bafua, ngeyo wuthanina muingi ndibika tibuka mu dibulu.

⁴ Luyimbidila Yave beno banlongo bandi ; Zitisanu dizina diandi di nlongo.

⁵ Bila nganzi andi yizingilanga mu ndambu thangu kaka. Vayi nlemvo andi wunzinganga mu zithangu zioso ; bidilu bilenda kuiza va builu ; vayi khini yinkuizanga va nsuka.

⁶ Bu ndiba mu luvovomo, ndituba : “Ndilendi nikunu ko”

⁷ A Yave, mu nlemvo aku, ngeyo wukindisa mongoꞌama… vayi bu wusueka zizi kiaku buna minu ndimona boma.

⁸ Kuidi ngeyo, a Yave, nditela mbila. Kuidi Yave ndiyamikina mu diambu di lusadusu

⁹ “Ndandu mbi yidi mu mbivusu ama, minu kuluka mu dibulu e ? Mbungi-mbungi yilenda kuzitisa e ? Voti yilenda yamikina kikhuikizi kiaku e ?

¹⁰ A Yave wa, wumboni kiadi, A yave, bika wuba lusadusu luama.”

¹¹ Ngeyo wuviakisa bidilu biama makinu, wunianguna tsaku ama ayi wuphuika khini.

¹² Muingi ntimꞌama wuyimbidila minkunga ayi wubika ba dio sui. A Yave, Nzambi ama, ndiela ku vutudilanga mu zithangu zioso.