Minkunga 24 - Nkanda Wu Moyo Nguizani yimona ayi minkunga

Minkunga 24 Yave kotidi mu buangu kiandi kinlongo

Nkunga Davidi.

¹ Ntoto widi wu Yave ayi bibioso bidi mu wawu ; nza ayi babo banzinganga muawu.

² Bila niandi wutunga ntoto va mbata mimbu ayi wukindisa wawu va mbata minlangu.

³ Nani wulenda kuma ku mongo wu Yave ? Nani wulenda telama va buangu kiandi kinlongo e ?

⁴ Woso mutu widi mioko misukulu ayi ntima wuvedila ; woso mutu wunkambu vumuna muelꞌandi kuidi bitumba, Voti wunkambu levanga ndefi mu mambu ma luvunu.

⁵ Wela tambula lusakumunu luela ba kuidi Yave, ayi ndungunu Nzambi yi Mvulusi andi.

⁶ Buawu bobo buididi tsungi yi batu bakuntombanga, yi bawu bantombanga zizi kiaku, a Nzambi yi Yakobi.

⁷ Luvumbula mintu mieno, beno mielo ! Luvumbuka beno mielo mikhulu ! Muingi ntinu wu nkembo kakota.

⁸ Nani ntinu wu nkembo e ? Keti Yave, nkua ngolo ayi nkua lulendo ! Keti Yave, nkua lulendo mu zimvita !

⁹ Luvumbula mintu mieno, beno mielo ! Luvumbuka beno mielo mikhulu ! Muingi ntinu wu nkembo kakota.

¹⁰ Nani wowo ntinu beni wu nkembo e ? Keti Yave, pfumu yi minkangu mi masodi. Niandi ntinu wu nkembo.