Minkunga 20 - Nkanda Wu Moyo Nguizani yimona ayi minkunga

Minkunga 20 Yave nungisa ntinu eto

Nkunga Davidi kuidi pfumu minyimbidi.

¹ Bika Yave kavana mvutu bu widi mu ziphasi, bika dizina di Nzambi yi Yakobi dikeba.

² Bika kafidisa lusadusu bu kadi ku buangu kinlongo Bika kakindisa bu kadi ku Sioni.

³ Bika katebukila makaba maku moso moyo. Ayi kakikinina makaba maku maviku.

⁴ Bika kavana bitidi ntimꞌaku. Ayi bika kanungisa zikhubukulu ziaku zioso.

⁵ Tuela yamikina mu khini bu wela tambula ndungunu. Tuela vumbula bidalapo bieto ku Yilu mu dizina di Nzambi eto. Bika Yave kadukisa zindombolo ziaku zioso.

⁶ Buabu nzebi ti Yave wumvukisanga mutu andi wuka vinda mafuta, weti kumvana mvutu bu kadi ku Diyilu, diandi dinlongo mu lusadusu luandi lungolo, lu koko kuandi ku lubakala.

⁷ Bankaka bantulanga diana mu matoma ma mvita, bankaka mu ziphunda. Vayi beto tuntulanga diana mu dizina di Yave, Nzambi eto.

⁸ Bawu beti fukama mu makuma mawu ayi beti bua ; Vayi beto tueti telama ayi tuidi kaka bakinda.

⁹ Yave vukisa ntinu Bika wutuvana mvutu mu thangu tueti tela.