Minkunga 2 - Nkanda Wu Moyo Nguizani yimona ayi minkunga

Minkunga 2 Mbiekolo ntinu

¹ Bila mbi makanda mafuemini e ? Bila mbi batu balembo yindudila mambu makambulu fuana e ?

² Bila mbi mintinu mi ntoto mitelimini e ? Bila mbi minyadi mikutikinini va kimosi mu nuanisa Yave ayi mutu andi kavinda mafuta e ?

³ Balembo tubi : “tuzenganu minsinga miawu ; tulozanu thama zisieni ziawu.”

⁴ Mutu wowo wunkalanga ku Diyilu wulembo sevi. Pfumu wulembo basekinina.

⁵ Bosi wulembo bayolukila mu nganzi andi, ayi wulembo kuba monisa tsisi mu miangu miandi mi ngolo.

⁶ Ayi wutuba : “Minu ndibieka ntinu ama ku Sioni, mongo ama wunlongo.”

⁷ Ndiela yamikisa lukanu lu Pfumu : Yave wukhamba : “Ngeyo widi muanꞌama. Minu ndibutidi mu lumbu kiaki.”

⁸ Wundombi ayi mandivana makanda ; ma maba kiuka kiaku ayi mawu vua ntoto wumvimba nate mu sukisina ntoto beni.

⁹ Wela kuba yadilanga mu nkawa wu sengo ; wela kuba bula banga bu mbudikilanga nzungu yi tuma.

¹⁰ Diawu, beno mintinu, bika luba nduenga. Bosi beno mazuzi ma ntoto, bika lutambula ndongokolo ;

¹¹ lusadila Yave mu lukinzu ayi lumona khini mu lukhuku.

¹² Lubumbakana muana mu diambu di kedi fuema ; ayi luedi bungana mu nzilꞌeno. Bila mu mbuetolo yi meso nganzi andi yilenda vika wulama. Lusakumunu kuidi batu boso bobo bantombanga suamunu mu niandi.