Minkunga 19 - Nkanda Wu Moyo Nguizani yimona ayi minkunga

Minkunga 19 Zitsongolo zizole zi Nzambi

Nkunga Davidi kuidi pfumu minyimbidi.

¹ Diyilu dieti samuna nkembo wu Nzambi ayi matuti meti yamikisa kisalu ki mioko miandi.

² Kadika Lumbu kinyamikisa mambu beni kuidi lumbu kinkaka ; ayi builu bumosi bueti ma zabikisa kuidi builu bunkaka.

³ Kuisi ko mambu mayoluka voti mambu masadila ; Kunkambu wakana zimbembo ziawu.

⁴ Zimbembo ziawu zieti wakana va ntoto wumvimba. Mambu mawu beti yoluka meti tula nate ku sukisina nza. Ku diyilu katungila nzo yi ngoto mu diambu di thangu :

⁵ Yawu yidi banga dibakala dikuela dintotuka va ntuala vinga kiandi, banga dikesa, dieti mona khini mu zawula thinu ;

⁶ Yintotukilanga ku tsongi yi Diyilu, bosi ku tsongi yinkaka kuawu kamanisinanga nzietolo andi. Kuisiko kima kinsuamanga va ntuala diamu diandi.

⁷ Mina mi Yave midi mifuana, mieti vananga diaka muela luzingu Zinzengolo zi Yave zidi zi kiedika Zinkitulanga mutu wu phamba mutu wu nduenga.

⁸ Minsiku mi Yave midi mi songa, minyangidikanga ntima. Zithumunu zi Yave zidi zivedila, zinkienzulanga meso.

⁹ Kinzika Yave didi diambu di vedila, dieti zingila mu zithangu zioso. Zitsikudukusu zi Yave zilenda siwulu diana, zizioso zidi zisonga va kimosi ;

¹⁰ Zilutidi thalu ayi nolo ; ayi viokila zinolo ziwombo zivedila zilutidi niosi mu lueki ; zilutidi yoyi yinkumba mu bisila.

¹¹ Mu ziawu mueti lubukila kisadi kiaku ; mfutu wunneni widi mu kuzikebanga.

¹² Nani wulenda sudika zinzimbala ziandi e ? Lemvukila zinzimbala ziama zisuama.

¹³ Keba kisadi kiaku mu masumu mamvangimina mu luzolo ; mabika ku ndiadila ; buna ndiela ba wukambu tsembolo ; wukambu zaba diambu mu masumu manneni.

¹⁴ Bika mambu ma munuꞌama ayi mayindu ma ntimꞌama maba ma khini va ntualꞌaku A Yave, ditadi diama ayi nkudi ama.