Minkunga 16 - Nkanda Wu Moyo Nguizani yimona ayi minkunga

Minkunga 16 Nzila yi luzingu

Nkunga Davidi.

¹ A Nzambi, wukheba mu luvovomo bila kuidi ngeyo nditombila suamunu.

² Kuidi Yave ndituba : “Ngeyo Pfumu ama, kuidi ngeyo kaka kueti banga mamboti mama.”

³ Mu diambu di banlongo bobo badi mu tsi ; bawu batu banzitusu. Khini yiwombo baku mbonisanga.

⁴ Bobo banlandakananga zinzambi zinkaka kiadi kiawu kiela buelama, voti ndilendi tambika makaba mawu ma menga ko, Ndilendi tanga mazina mawu mu bididi biama ko.

⁵ Yave ngeyo wuphana ndambu yi kiuka kiama, ayi mbungu ama, ngeyo wunkebanga kuku kiama mu luvovomo.

⁶ Zindili zikubuku mu diambu diama mu buangu bidi kitoko ; bukiedika, thambudi kiuka ki mboti.

⁷ Ndiela zitisa Yave ; wukuphananga malongi ntimꞌama wukundonganga mu builu,

⁸ Ndieti tula Yave ku ntualꞌama mu zithangu zioso bila widi ku koko kuama ku lubakala, ndilendi nikuka ko.

⁹ Diawu ntimꞌama wididi mu khini ; ludimi luama lueti yangalala ayi nitu ama yela vunda mu luvovomo ;

¹⁰ Bila ngeyo wulendi kundiekula ko ku tsi bafua, ayi wulendi tala ko mutu aku wunlongo kabola.

¹¹ Ngeyo wumbonisa nsolo wu luzingu ; zikhini ziwombo zidi va ntuala zizi kiaku. Wela kumbonisa khini va meso maku va kimosi ayi zikhini zika zisukanga ko zidi va koko kuaku ku lubakala.