Minkunga 148 - Nkanda Wu Moyo Nguizani yimona ayi minkunga

Minkunga 148 Mu diyilu ayi va ntoto

¹ Luzitisa Yave ; luzitisa Yave tona mu diyilu. Lunzitisa mu bibuangu bizangama ngolo.

² Lunzitisa, beno zimbasi ziandi zioso ; lunzitisa beno minkangu miandi mioso mi masodi ma diyilu.

³ Lunzitisa beno thangu ayi ngondi, lunzitisa beno zimbuetete zioso zidi kiezila.

⁴ Lunzitisa ngeyo diyilu dizangama ngolo ayi beno minlangu midi ku mbata diyilu,

⁵ bika bizitisa dizina di Yave ; bila niandi wuvana lutumunu ayi biawu bivangama.

⁶ Wubivuandisa va buangu mu zithangu zioso ayi mu thangu yi kayimani. Niandi wuvana nzengolo yayi, yikayilendi vioka ko.

⁷ Luzitisa Yave tona va ntoto, beno bivangu binneni bi mbu ayi beno zithipula zioso zi mbu ;

⁸ mbazu ayi mvula yi matadi, mvula yi phembi ayi matuti ; vuka ki phemo kieti sadila zithumunu ziandi.

⁹ Beno miongo ayi miongo mioso mi fioti ; minti mimbutanga makundi ayi minti mioso mi Sedeli ;

¹⁰ bibulu bi nsitu ayi bibulu bibioso bi fioti, bivangu bi fioti ayi zinuni zieti dumuka ;

¹¹ mintinu mi ntoto ayi makanda moso ; beno bana ba mintinu ayi minyadi mioso mi ntoto ;

¹² bamatoko ayi bandumba, binunu ayi bana balezi

¹³ bika bazitisa dizina di Yave bila dizina diandi diawu kaka difueni mu yayusu ; kiezila kiandi kidi va yilu ntoto ayi ku yilu diyilu.

¹⁴ Niandi wutotudila batu bandi phoka, nzitusu wu banlongo bandi boso ; wu Iseli, batu bobo badi bakangama mu ntimꞌandi. Luzitisa Yave.