Minkunga 146 - Nkanda Wu Moyo Nguizani yimona ayi minkunga

Minkunga 146 Yave weti nungisa batu bayamusu

¹ Luzitisa Yave ; Zitisa Yave, a muelꞌama.

² Ndiela zitisanga Yave mu luzingu luama loso ; ndiela yimbidilanga Nzambi ama minzitusu thangu yoso ndizingila.

³ Kadi tula diana dieno mu bana ba mintinu, mu batu bobo beti fua, bobo balendi vukisa ko.

⁴ Pheve awu yawu kuenda buna beti vutuka mu ntoto ; zikhanu ziawu zilalikini.

⁵ Lusakumunu kuidi mutu wowo widi ti Nzambi yi Yakobi niandi nsadisi andi ; wuntulanga diana diandi mu Yave, Nzambi andi,

⁶ mvangi wu diyilu, ntoto, mbu ayi bibio bidi muna ; widi wukuikama mu zithangu zioso.

⁷ Niandi weti vavila mambu ma bobo beti yamusu, ayi wumvananga bidia kuidi bobo badi nzala ; Yave niandi weti totula batu bobo badi mu nloko.

⁸ Yave weti vana kiezila kuidi phofo, Yave weti vumbula bobo badi bakomvama. Yave weti zola batu basonga.

⁹ Yave weti sunga nzenza, niandi wunkindisanga muana sana ayi difuola vayi weti kakumukina zinzila zi batu bambimbi.

¹⁰ Yave wunyalanga mu zithangu zioso. Nzambi aku, a Sioni, mu zitsungi zioso. Luzitisa Yave.