Minkunga 144 - Nkanda Wu Moyo Nguizani yimona ayi minkunga

Minkunga 144 Batu baku badi mu khini

Nkunga Davidi.

¹ Bika, nzitusu wuba kuidi Yave, ditadi diama ; weti longa mioko miama mu nuana mvita ayi minlembo miama mu nuana khindu.

² Niandi Nzambi ama yi luzolo ayi tinunu kiama niandi suamunu kiama kingolo ayi niandi nkuidi ama, niandi nkaku ama ; mu niandi ndieti suamina ayi niandi wuntulanga batu ku tsi luyalu luama.

³ A Yave, buna mutu niandi nani muingi wumbelanga mayindu ; muana mutu muingi wunyindulanga e ?

⁴ Mutu dedakani banga phemo ; bilumbu biandi bidi banga kitsusula kimvioka.

⁵ Vasa diyilu diaku, a Yave, ayi kuluka ; simba miongo muingi mitotula muisi.

⁶ Fidisa zitsiemo ku ntuala ayi sasikisa bambeni ziama. Loza madionga maku ayi wuba zimbikisa.

⁷ Yalumuna koko kuaku bu widi ku yilu ; wuphukisa ayi wukhula mu minlangu mi nguma ayi mu mioko mi banzenza,

⁸ bobo miunu miwedi luvunu ; bobo mioko mi lubakala mibeki mayuya.

⁹ Ndiela kuyimbidila nkunga wumona, a Nzambi. Mu siku ki kumi di minsinga, kioki beti tedila Lila, ndiela bula miziki,

¹⁰ Kuidi mutu wowo wumvananga kuidi mintinu ndungunu, mutu wowo wunkulanga kisadi kiaku Davidi mu sabala kimvondanga.

¹¹ Wuphukisa ayi wukhula mu mioko mi banzenza ; bobo miunu miwedi luvunu bobo mioko mi lubakala mibeki mayuya.

¹² Buna bana beto babakala, mu bumuana buawu bela ba banga bikunusu binyundukanga bumboti. Bana beto babaketo bela ba banga makunzi mafikulu ; mammonisanga kitoko ki buangu.

¹³ Bilundulu bieto biela ba biwala mu kadika ntindu wu bidia ; minkangu mieto mi mamemi miela buelama ayi buelama mu zimili zi zimili mu makumi ma zimili mu zitsola zieto.

¹⁴ Zingombi zieto zikheto ziela nata mfuna wungolo, mavudu malendi ba ko mu bibaka bieto kadi buela kuenda mu kivika, yamikina ku ziphasi kulendi ba diaka ko mu zinzila zieto.

¹⁵ Lusakumunu kuidi batu bobo mambu mama meti vangama. Lusakumunu kuidi batu bobo Yave kadidi Nzambi.