Minkunga 143 - Nkanda Wu Moyo Nguizani yimona ayi minkunga

Minkunga 143 Wundiatisa mu zinzila ziaku

Nkunga Davidi.

¹ A Yave, wa lusambulu luama, dimba yamikina kuama mu diambu di kiadi mu kikhuikizi kiaku ayi mu busonga buaku, yiza wutsadisa.

² Kadi nata kisadi kiaku ku tsambusu ; bila kadi mutu wumosi widi moyo widi wusonga va ntualꞌaku.

³ Bila mbeni wulembo ndandakana, wulembo ndiatidila va tsi ; niandi wukuphuandisanga mu bibuangu bidi tombi banga batu bobo bafua thama.

⁴ Buna pheve ama yeka suka-suka mu khati ama ; ntimꞌama weka mona tsisi mu khati ama.

⁵ Ndilembo tebukila moyo bilumbu bivioka. Ndinyindulanga mavanga maku moso ayi fiongunina mavanga ma mioko miaku.

⁶ Ndinonuna mioko miama kuidi ngeyo. Muelꞌama widi phuila mu kumona banga ntoto wu yuma, bu wididi phuila nlangu.

⁷ Wuphani mvutu mu nsualu, a Yave pheve ama yilembo yami. Kadi kutsuekila zizi kiaku bila ndieka dedakana banga bobo bankuendanga ku dibulu.

⁸ Bika nsuka wundatina mambu ma luzolo luaku lu ngolo ; bila nditula diana diama mu ngeyo. Wumbonisa nzila yoyi mfueti kuendila bila kuidi ngeyo ndimvumbula muelꞌama.

⁹ Wukhula mu bambeni ziama, a Yave ; bila ndikukisuekanga mu ngeyo.

¹⁰ Wundonga mu vanga luzolo luaku bila ngeyo Nzambi ama. Bika pheve aku yimboti yindiatisa mu ntoto wulendumuka.

¹¹ Mu diambu di dizina diaku, a Yave, tamina luzingu luama ; mu busonga buaku, bika wuthotula mu ziphasi.

¹² Mu luzolo luaku lu ngolo, kanga bambeni ziama ; bunga babo bobo beti kundenda, bila ndidi kisadi kiaku.