Minkunga 142 - Nkanda Wu Moyo Nguizani yimona ayi minkunga

Minkunga 142 Ngeyo kaka suamunu kiama

Nkunga Davidi kayimbidila banga lusambulu mu thangu kaba mu nsuku.

¹ Ndinyamikina ngolo kuidi Yave Ndimvumbula mbembo ama kuidi Yave mu diambu di kiadi.

² Ndilembo dukula luniongo luama va ntualꞌandi ; va ntualꞌandi, ndinyolukila ziphasi ziama.

³ Mu thangu phevi ama yilembo suki-suki mu khati ama, keti ngeyo wuzaba nzilꞌama. Mu nsolo wowo ndidiatila, muawu batu bathambila ntambu.

⁴ Tala ku lubakala luama ayi tala, kadi mutu widi mayindu mu minu. Ndisi kadi suamunu ko kuisi ko mutu wumbanzila luzingu luama.

⁵ Kuidi ngeyo ndinyamikina, a Yave. Ndilembo tubi : “ngeyo suamunu kiama ; Ngeyo kuku kiama va ntoto wu batu badi moyo.”

⁶ Dimba yamikina kuama bila ndidi nsukami wu ngolo, wukambulu diana ; wukhula mu bobo balembo ndandakana bila bawu bandutidi ngolo.

⁷ Bika wuthotula nloko ama muingi ndizitisa dizina diaku ; buna basonga bela kuiza kutakana va ndidi mu diambu di mamboti maku kuidi minu.