Minkunga 141 - Nkanda Wu Moyo Nguizani yimona ayi minkunga

Minkunga 141 Bika wutsimba mu koko kuaku

Nkunga Davidi.

¹ A Yave, ngeyo nditela ; yiza nsualu kuidi minu. Wa mbemboꞌama mu thangu ndilembo kutedi.

² Bika lusambulu luama luba va ntualꞌaku banga ansa bika mvumbudulu yi mioko miama yiba banga dikaba di masika.

³ Tula nsungi va munu ama, a Yave ; keba bumboti muelo wu bididi biama.

⁴ Kadi yinika ntimꞌama ku mambimbi, mu baka kuku mu mavanga mambimbi va kimosi ayi bamvanganga mambimbi ; kadi tala ti ndidia bidia biawu bidi lueki.

⁵ Bika mutu wusonga kambeta, diodi didi dimboti ; bika kathemina, diodi didi mafuta va ntuꞌama ; ayi ntuꞌama wulendi manga mawu ko. Muaki lusambulu luama luela nuanisanga mu zithangu zioso mavanga ma batu bamvanganga mambimbi.

⁶ Minyadi miawu miela lozo ku tsi tona ku yilu ngumbu ayi batu bambimbi bela longuka ti mambu mama ndituba, matubu bumboti.

⁷ Bela tuba : “mutu bu keti kabila ntoto ayi vasila ntoto buawu bobo mimvesi mieto mididi misasakana va muelo tsi bafua”.

⁸ Vayi meso mama madi kaka kuidi ngeyo Yave, mutu wumvanganga makazodidi Kuidi ngeyo ndintombila suamunu, kadi kundiekula mu lufua.

⁹ Wukheba mu makondi bathambila ayi mu mintambu mitula batu bamvanganga mambimbi.

¹⁰ Bika batu bambimbi, babua mu makondi mawu veka vayi minu ndiviokila vawu mu luvovomo.