Minkunga 140 - Nkanda Wu Moyo Nguizani yimona ayi minkunga

Minkunga 140 Bika wukhula mu mimvuezi

Nkunga Davidi kuidi pfumu minyimbidi.

¹ Wukhudi, a Yave, mu mutu wumbimbi ; wukheba mu mutu wu makhemi ;

² bobo banyindulanga zikhanu zimbimbi mu mintima miawu ayi bantombanga lumbu ka lumbu nuana mvita.

³ Beti kitula ludimi luawu meno banga lu nioka ; mitsa mi bikusa midi mu bididi biawu.

⁴ Wukheba, a Yave, mu mutu wumbimbi. Wuthanina mu batu badi makhemi ; bobo beti kubika zikhanu mu buisa malu mama.

⁵ Batu ba luniemo bathambila makondi ; bayalumuna minsinga mi makondi mawu ayi bathambila mintambu muyenda nsolo ama.

⁶ A Yave, ndituba kuidi ngeyo : “ngeyo Nzambi ama.” Wa, a Yave, yamikina kuama bu ndintomba monono kiadi.

⁷ A Yave, mutu wumvanganga makazodidi ngeyo nkudi ama wu ngolo ngeyo weti kaka ntuꞌama mu lumbu ki mvita.

⁸ Kadi tala zitsatu zi batu bambimbi zivangama, a Yave. Kadi tala ti zikhanu ziawu zinunga nganu bela ba luniemo.

⁹ Bika mintu mi bobo banzungididi mifuku kuidi ziphasi ziozi bididi biawu bitotula.

¹⁰ Bika makala ma mbazu mabua va bawu. Bika balozo ku mbazu, ku tsi mabulu madi nyamba ; babika buela telama.

¹¹ Bika mimvuezi mibika zingila mu tsi ; bika mabienga malandakana mu kambu vonga batu badi makhemi.

¹² Nzebi ti Yave weti vana luvovomo lusonga kuidi nsukami ayi wela nuanina minsukami.

¹³ Bukiedika, basonga bela zitisa dizina diaku ayi batu badi mintima milulama bela zingila va ntualꞌaku.