Minkunga 14 - Nkanda Wu Moyo Nguizani yimona ayi minkunga

Minkunga 14 Nza yidi yi biva

Nkunga Davidi kuidi pfumu minyimbidi.

¹ Nkua buvulu wuntubanga mu ntimꞌandi ti : Kuisiko Nzambi ! Baki bivisidi, mavanga mawu madi mambimbi ; kuisiko mutu wumvanganga mamboti.

² Yave, ku yilu ku kadi, wulembo tadi bana ba batu mu tala kani wulenda mona wumosi wunsundika, kani wumosi wuntombanga Nzambi.

³ Baboso bavengama ayi bamana kibivisa va kimosi ; kuisiko mutu wumvanganga mamboti, kadi mutu wumosi.

⁴ Batu boso bamvanganga mambu mambimbi basi nzayilu ko e ? Bobo balembo dia batu bama, banga batu bandia dipha ayi bobo batelanga dizina di Yave ko.

⁵ Buna kuna bela tita mu diambu di tsisi bila Nzambi widi va khatitsika dikabu di batu basonga.

⁶ Beno mimvangi mi mambimbi, lulenda vunza zikhanu zi nsukami. Vayi Yave niandi suamunu kiandi.

⁷ A enati phulusu yi Iseli yitotukila ku Sioni ! Mu thangu Yave kela vutula kiuka ki batu bandi Bika Yakobi kamona khini ayi Iseli kayangadala.