Minkunga 139 - Nkanda Wu Moyo Nguizani yimona ayi minkunga

Minkunga 139 Pfumu, ngeyo zebi mambu mama moso

Nkunga Davidi kuidi Pfumu minyimbidi.

¹ A Yave ngeyo wuthomba ayi ngeyo wunzebi.

² Ngeyo zebi thangu ndidi wuvuanda ayi thangu ndidi wutelama ; ngeyo weti bakula bumboti mayindu mama bu makidi thama.

³ Ngeyo zebi thangu ndieti totuka ayi thangu ndieti lambalala ; Ngeyo zebi bumboti zinzila ziama zioso.

⁴ Tuamina mambu maba va ludimi luama, ngeyo zebi mawu moso, a Yave.

⁵ Ngeyo wunzungididi ku manima ayi ku ntuala Ngeyo wutetika koko kuaku va minu.

⁶ Nzayilu yi phila yoyi, yididi ngolo yitsiminanga kuidi minu ; yididi ngolo yinangama muingi ndiyibakidila.

⁷ Kuevi ndilenda kuenda suamina phevi aku e ? A kuevi ndilenda kuenda tinina meso maku e ?

⁸ Enati khumini ku Diyilu, ngeyo widi kuna ; enati minu thudidi mbukꞌama ku tsina ntoto, ngeyo widi kuna.

⁹ Enati khumini mu mavavi ma nkielo buisi ; enati phuendi ku lubakala lu mbu,

¹⁰ buna kuna diaka, koko kuaku kuela kundiatisa ; koko kuaku ku lubakala kuela kutsimbidila ngolo.

¹¹ Enati khembi : “Bukiedika tombi kiela kutsueka” vayi buna kiezila kikitukidi tombi va ndidi.

¹² Muaki tombi kilendi ba tombi kuidi ngeyo ko ; builu buela kienzuka banga muini bila tombi kidi banga kiezila kuidi ngeyo.

¹³ Ngeyo wuvanga binama biama bi khati nitu ; ngeyo wuthunga va kimosi mu vumu ki ngudi ama.

¹⁴ Ndikuzitisa bila ndidi vangu ki tsisi ayi kitsiminanga ; mavanga maku madi matsiminanga ayi nzebi buawu bumboti.

¹⁵ Khubukulu ama yi mimvesi yisia suama va ntualꞌaku ko mu thangu ndikubuku mu buangu kisuama ; mu thangu ndivangu va kimosi ku tsina ntoto.

¹⁶ Meso maku mamona nitu ama yikambu kubuku. Bilumbu bioso biobi wukhubikila biba bisonama mu bukuꞌaku, tuamina lumbu kimosi mu biawu kiba.

¹⁷ A phila thalu mayindu maku kuidi minu, a Nzambi ! A phila woka madi !

¹⁸ Enati thidi ku matanga ; buna maviokidi nzielo mu thalu ; Bu khotukidi, minu ndidi kaka yaku.

¹⁹ Enati ngeyo wuzola kaka vonda mutu wumbimbi, a Nzambi ! Bika luthatukila beno luntengulanga menga !

²⁰ Beti kuyolukila mu zikhanu zimbimbi ; bobo beti kulenda beti sadila dizina diaku mu kambu fuana.

²¹ Buevi, ndilendi lenda ko bobo beti kulenda, a Yave ? A buevi, ndilendi kakumukina ko bobo beti kufuemi e ?

²² Ndisi kadi diambu ko vayi kikhenene kaka ndidi kuidi bawu ; ndieti ba tanga bambeni ziama.

²³ Wumfiongunina, a Nzambi, ayi zaba ndimꞌama ; wuthota ayi zaba mayindu mama.

²⁴ Tala kani nzila yimbimbi yidi mu minu ayi wundiatisa mu nzila yi mvu ka mvu.