Minkunga 138 - Nkanda Wu Moyo Nguizani yimona ayi minkunga

Minkunga 138 Thidi yimbidila kikhuikizi kiaku

Nkunga Davidi.

¹ Ndiela kuzitisa, a Yave, mu ntimꞌama wumvimba ; ndiela yimbila minzitusu miaku va ntuala zinzambi.

² Ndiela buongama ku ndambu nzo aku yinlongo ; ayi ndiela zitisa dizina diaku mu diambu di luzolu luaku ayi mu diambu di kikhuikizi kiaku bila ngeyo wuyayisidi dizina diaku ayi mambu maku va yilu bima bioso.

³ Thangu nditela, ngeyo wuphana mvutu. Wukhitula nkua ngangu ayi nkua bukhafi bu ngolo.

⁴ Bika mintinu mioso mintoto mizitisa, a Yave bu miwilu mambu ma munu aku.

⁵ Bika miyimbila zinzila zi Yave bila nkembo wu Yave widi wunneni.

⁶ Ka diambu ko Yave widi wuzangama, niandi weti tala bobo beti kukikulula ayi zebi bumboti batu badi luniemo bu badi ku thama.

⁷ Ka diambu ko ndilembo diatila va khatitsika ziphasi, ngeyo weti tanina luzingu luama ; ngeyo weti nonuna koko kuaku mu kakidila zinganzi zi bobo beti kundenda ; mu koko kuaku ku lubakala weti kuphukisila.

⁸ Yave wela dukisa mambu momo keti tomba mu minu. Luzolo luaku, a Yave, lunzingilanga mu zithangu zioso. Kadi yekula bisalu bi mioko miaku.