Minkunga 135 - Nkanda Wu Moyo Nguizani yimona ayi minkunga

Minkunga 135 Pfumu widi wumboti

¹ Luzitisa Yave, luzitisa dizina di Yave, lunzitisa beno bisadi bi Yave ;

² beno lunsalanga mu Nzo Yave, mu ziphangu zi Nzo yi Nzambi eto.

³ Luzitisa Yave bila Yave widi wumboti ; luyimbila minzitusu mu diambu di dizina diandi, bila didi diambu di kitoko.

⁴ Bila Yave wukisobudila Yakobi mu ba wandi veka, Iseli, mu diambu kaba kiuka kioki kavuidi niandi veka.

⁵ Nzebi ti Yave widi wunneni, ti Yave eto widi wunneni viokila zinzambi zioso.

⁶ Muaki Yave weti vanga moso kazodidi, mu diyilu ayi vava ntoto, mu mimbu ayi mu mabulu mawu moso madi thipula.

⁷ Niandi wuntotulanga matuti mu zitsongi zi ntoto ; niandi wumfidisanga zitsiemo va kimosi ayi mvula ayi wuntotulanga phemo mu bibuangu biandi biobi kalundila wawu.

⁸ Niandi wuvonda bana batheti mu Ezipite, bana batheti ba batu ayi ba bibulu.

⁹ Wufidisa bidimbu biandi ayi matsiminanga va khatitsikꞌaku, a Ezipite mu diambu di nuanisa Falawo ayi bisadi biandi bioso.

¹⁰ Niandi wuvonda makanda mawombo ayi wuvonda mintinu mi lulendo.

¹¹ Sihoni ntinu basi Amoli ; Ongi ntinu basi Basani ayi mintinu mioso mi Kana.

¹² Ayi wuvana zitsi ziawu banga kiuka ; kiuka kuidi Iseli, batu bandi.

¹³ Dizina diaku, a Yave, dinzingilanga mu zithangu zioso, zitsangu ziaku, a Yave, mu zitsungi zioso.

¹⁴ Bila Yave wela nungisa batu bandi ayi wela mona bisadi biandi kiadi.

¹⁵ Bitumba bi makanda bidi bi palata ayi bi nolo ; bivangulu mu mioko mi batu ;

¹⁶ bibeki miunu vayi bilendi tuba ko ; meso vayi bilendi mona ko ;

¹⁷ Bibeki matu vayi bilendi wa ko bisi kadi phemo ko mu miunu miawu.

¹⁸ Batu bobo beti vanga biawu bela ba banga biawu ayi buawu bobo buela bela bobo bantulanga diana mu biawu.

¹⁹ A nzo yi Iseli, luzitisa Yave. A nzo yi Aloni, luzitisa Yave.

²⁰ A nzo yi Levi, luzitisa Yave. Beno lueti kunkinzika, luzitisa Yave.

²¹ Bika nzitusu wuba kuidi Yave tona mu Sioni kuidi niandi weti vuanda ku Yelusalemi. Luzitisa Yave.