Minkunga 130 - Nkanda Wu Moyo Nguizani yimona ayi minkunga

Minkunga 130 Ku tsi ziphasi nditela Yave.

Nkunga wunyimbudulu mu nzila yinkuendila ku nzo Yave.

¹ Bu nditotuka mu mabulu madi thipula, ndiyamikina kuidi ngeyo, a Yave.

² A Yave, wa mbemboꞌama ; bika wutamba matu maku mu yamikina kuama mu diambu di lusadusu.

³ Enati ngeyo, a Yave, weti tangisa masumu A Yave buna nani wulenda telama e ?

⁴ Vayi kuidi ngeyo kuidi ndemvukulu yi masumu ; diawu fueni kinzuku.

⁵ Ndimvingila Yave, muelꞌama wulembo vingila ; ayi mu mambu mandi, ndintula diana diama.

⁶ Muelꞌama wumvingila Yave viokila minsungi mimvingila nsuka. Nyinga viokila minsungi mimvingila nsuka.

⁷ A Iseli, tula diana diaku mu Yave Bila mu niandi muidi luzolo lu ngolo ayi mu niandi muidi khudulu yiduka.

⁸ Niandi veka wela kula Iseli mu masumu mawu moso.