Minkunga 115 - Nkanda Wu Moyo Nguizani yimona ayi minkunga

Minkunga 115 Nzambi, niandi kaka vuidi nkembo

¹ Bika kuidi beto, a Yave, bika kuidi beto ; vayi kuidi dizina diaku kuba nkembo, mu diambu di luzolo luaku ayi kikhuikizi kiaku.

² Bila mbi makanda malembo tubila ti : “Kuevi kuidi Nzambi awu e ?”

³ Nzambi eto widi ku Diyilu, niandi weti vanga moso katidi.

⁴ Vayi bitumba biawu bidi palata ayi nolo ; bivangulu mu mioko mi batu.

⁵ Bibeki miunu vayi bilendi yoluka ko ; meso vayi bilendi mona ko.

⁶ Bibeki matu vayi bilendi wa ko ; mayilu vayi bilendi wa tsudi ko.

⁷ Bibeki mioko vayi bilendi simba ko, malu vayi bilendi diata ko. Voti bilendi totula ko biyoko mu phovi-yi-dilaka diawu.

⁸ Batu bobo bavanga biawu bela ba banga biawu, ayi buawu bobo buela bela batu boso bobo bantulanga diana mu biawu.

⁹ A nzo yi Iseli, tula diana mu Yave. Niandi nsadisi awu ayi nkaku awu.

¹⁰ A Nzo yi Aloni, tula diana mu Yave. Niandi nsadisi awu ayi nkaku awu.

¹¹ Beno lueti kunkinzika, lutula diana mu Yave. Niandi nsadisi awu ayi nkaku awu.

¹² Yave weti kututebukila moyo ayi wela kutusakumuna. Wela sakumuna nzo yi Iseli, wela sakumuna nzo yi Aloni.

¹³ Wela sakumuna bobo beti kinzika Yave, batu baphamba va kimosi ayi batu banneni.

¹⁴ Bika Yave kaluwokisa, beno ayi bana beno va kimosi.

¹⁵ Bika Yave kalusakuna, mvangi wu diyilu ayi ntoto.

¹⁶ Yave niandi vuidi Diyilu dizangama vayi ntoto wuvanu kuidi mutu.

¹⁷ Kadi sia ti bafua bawu beti zitisa Yave ; bobo bankuendanga ku tsi yidi dio sui.

¹⁸ Vayi beto tueti yayisa Yave tona buabu nate mu zithangu zioso. Luzitisa Yave.