Minkunga 112 - Nkanda Wu Moyo Nguizani yimona ayi minkunga

Minkunga 112 Mamboti ma mikhuikizi

¹ Luzitisa Yave ! Lusakumunu kuidi mutu wowo weti kinzika Yave ; wowo weti mona khini mu zithumunu ziandi.

² Bana bandi bela ba lulendo va ntoto ; Tsungi yi batu balulama yela sakumunu.

³ Bima biwombo ayi kimvuama bidi mu nzo andi ayi busonga buandi bunzingilanga mu zithangu zioso.

⁴ Ka diambu ko mu tombi, kiezila kieti kienzuka mu diambu di batu balulama mu mintima ; mu diambu di nkua nlemvo ayi nkua kiadi ayi mutu wusonga.

⁵ Mamboti mela kuiza kuidi mutu wowo wunkabulanga mu luzolo ayi wundevisanga mu kambu kuiku ; ayi wundiatisanga bisalu biandi mu busonga.

⁶ Bukiedika kalendi nikuka ko ; mutu wusonga wela tebukulungu moyo mu zithangu zioso.

⁷ Kalendi mona zitsangu zimbimbi tsisi ko. Ntimꞌandi widi wukinda, wuntulanga diana mu Yave.

⁸ Ntimꞌandi widi mu luvovomo, kalendi mona tsisi ko ku tsuka wela nunga mu tala batu bobo beti kunlenda.

⁹ Wunkabulanga mu zindambu zioso makaba mu diambu di nsukami ; busonga buandi bunzingilanga mu zithangu zioso ; phokꞌandi yela vumbulu ngolo mu nzitusu.

¹⁰ Mutu wumbimbi wela bumona ayi wela fuema ; wela kueta meno ayi wela lalakana. Zikhanu zi mutu wumbimbi ziela kituka ziphamba.