Minkunga 111 - Nkanda Wu Moyo Nguizani yimona ayi minkunga

Minkunga 111 Wuvanga matsiminanga

¹ Luzitisa Yave ! Ndiela yayisa Yave mu ntimꞌama wumvimba, mu dikabu di batu balulama ayi mu lukutukunu lu batu.

² Mavanga ma Yave madi manneni, meti yindulu kuidi bobo beti kumazola.

³ Mavanga mandi madi ma nkembo ayi ma nzitusu ayi busonga buandi bunzingilanga mu zithangu zioso.

⁴ Niandi wuvanga ti matsiminanga mandi matebukulukungu moyo. Yave widi nkua nlemvo ayi nkua kiadi.

⁵ Niandi weti vana bidia kuidi bobo beti kunkinzika ; wuntebukilanga moyo Nguizani andi mu zithangu zioso.

⁶ Wumonisa batu bandi lulendo lu bisalu biandi ; bu kaba vana mintoto mi makanda mankaka.

⁷ Bisalu bi mioko miandi bidi kikhuikizi ayi busonga ; minsiku miandi mioso mifueni mu tudulu diana,

⁸ mikindusu mu zithangu zioso ayi mu kadika mvu ; mivangulu mu kikhuikizi ayi mu bufuana.

⁹ Niandi wuvana khudulu kuidi batu bandi ; niandi wutumina nguizani andi mu zithangu zioso. Dizina diandi didi dinlongo ayi tsisi didi.

¹⁰ Kinzika Yave yawu thonono yi nduenga, Babo bobo beti landakana minsiku miandi babeki diela dimboti. Niandi vuidi nzitusu mu zithangu zioso.