Minkunga 110 - Nkanda Wu Moyo Nguizani yimona ayi minkunga

Minkunga 110 Niandi widi va kimosi ntinu ayi nganga Nzambi

Nkunga Davidi.

¹ Yave wutuba kuidi Pfumu ama : “Vuanda va koko kuama ku lubakala nate ndikitula bambeni ziaku kima kioki beti tetika malu mu diambu di malu maku.”

² Yave wela nonuna nkawa aku wu lulendo wu kipfumu tona ku Sioni ; wela yadila va khatitsika bambeni ziaku.

³ Minkangu miaku mi masodi miela ba luzolo lumboti ; mu lumbu kiaku ki mvita bavuata nzitusu wunlongo tona mu khiesa buisi wela tambula bimi bi bumuana buaku.

⁴ Yave wuzenga ndefi, kalendi viakisa mayindu mandi ko : “ngeyo widi nganga Nzambi mu zithangu zioso mu ntanda wu Meleshisedeki.”

⁵ Yave widi va koko kuaku ku lubakala ; wela kosikisa mintinu mu lumbu ki miangu miandi mi ngolo.

⁶ Wela sambisa makanda, kupikisa bafua Niandi wela kosikisa minyadi va ntoto wumvimba.

⁷ Niandi wela nua nlangu wu mvuila mu ndambu nzila, diawu kela vumbudila ngolo ntu andi.