Minkunga 11 - Nkanda Wu Moyo Nguizani yimona ayi minkunga

Minkunga 11 Suamunu ki kiedika

Nkunga Davidi kuidi pfumu minyimbidi.

¹ Kuidi Yave ndintombilanga suamunu. Buevi lulenda ku khambila : “Tinina ku miongo miaku banga bu ntininanga nuni.”

² Bila tala, batu bambimbi balembo leki mimbasa ; ayi balembo ludika zitsoto va nsinga mi mimbasa muingi babasula, bu badi mu tombi, batu bobo badi mintima mi lulama.

³ Enati zifundasio zitiolumunu, buna mutu wusonga, mbi kalenda vanga e ?

⁴ Yave widi mu nzoꞌandi yinlongo ! Yave, kundu kiandi ki luyalu kidi ku diyilu, meso mandi malembo tadi ayi zindabu ziandi zimfionguninanga bana ba batu.

⁵ Yave wumfionguninanga mutu wusonga vayi muelꞌandi weti lenda mutu wumbimbi ayi mutu wowo wunzolanga matsita.

⁶ Wunokisanga makala ayi sofolo yi mbazu. Kuidi batu bambimbi, Phemo yi mbazu yawu kopo yi ziphasi bela kabana.

⁷ Bila Yave widi wusonga, wunzolanga masonga. Batu badi mintima mi lulama bela talanga zizi kiandi.