Minkunga 108 - Nkanda Wu Moyo Nguizani yimona ayi minkunga

Minkunga 108 Ndiela nunga

Nkunga Davidi.

¹ Ntimꞌama widi wukinda, a Nzambi. Ndiela yimbila ayi ndiela bula miziki mu muelꞌama woso.

² Kotukanu beno ngitala ayi Lila ; ndiela kotula khiesa buisa.

³ Ndiela kuzitisa, a Yave, va khatitsika makanda, ndiela kuyimbidila va khatitsika batu

⁴ Bila luzolo luaku luidi lunneni, luidi luzangama viokila diyilu kikhuikizi kiaku kieti tula nate ku matuti.

⁵ Yayusu kuaku, a Nzambi, ku yilu diyilu ayi bika nkembo aku wuba va ntoto wumvimba ;

⁶ Wutuvukisa ayi wutusadisa mu koko kuaku ku lubakala muingi bobo weti zola bakulu.

⁷ Nzambi wutuba tona ku buangu kiandi kinlongo : “mu ndungunu, ndiela vasa Sikemi ayi ndiela teza ndimba wu Sikoti.

⁸ Minu phuidi Galadi, minu phuidi Manase ; Efalayimi wawu nkaku wu ntu ama Yuda nkawꞌama wu kipfumu.

⁹ Mowabi diawu dibola diodi ndieti yobidila. Va yilu Edomi ndiloza zisandale ziama, ndiela yamikina mu diambu di ndungunu ama mu basi Filisiti.”

¹⁰ Nani wela kundata ku divula dikindusu ngolo e ? Nani wela kuthuadisa ku Edomi e ?

¹¹ Keti ngeyo, a Nzambi, ngeyo wutuloza, ngeyo wunkambu buela totukanga ayi minkangu mi masodi meto e ?

¹² Wutuvana lusadusu va ntuala mbeni bila lusadusu lu mutu luidi lu phamba.

¹³ Va kimosi ayi Nzambi, tuela tunga ayi wela kosikisa bambeni zieto.