Yona 4 - Bible en Kiyombe

Nganzi yi Yona ayi khenda yi Nzambi

¹ Vayi Yona wumona diambu beni ti dimbimbi, buna wufuema ngolo.

² Buna wusambila Yave ayi wukamba: «Ah! Yave, disi ko diawu diambu diami mu thangu ndibedi mu tsi ami ? Diawu ndiyendila kuntuala ayi nditinina ku Talasi bila ndizaba ti widi Nzambi yi khenda ayi yi nlemvo, wufuemangaku nsualu ko ayi widi wuwala mu mbote, ayi wuniongulukilanga mambi.

³ Ayi buabu, Yave, ndikubombidila, botula muela ami, bila mbote kudi minu mufua vayi kadi zinga.»

⁴ Vayi Yave wukamba: «Dimbote vengi mu fuema?»

⁵ Buna Yona wutotuka mu mbanza ayi wuyekala ku ntotukilanga thangu. Kuna katunga mua muanzu muingi kakala vadi phosi, nate kamueni dieka nkuiza mu mbanza.

⁶ Yave Nzambi wumenisa mua nsinga dilengi, fimena va mbata Yona, muingi fivana phosi va ntu andi ayi kumvukisa mu phasi zandi. Yona wuyangalala ngolo mu fi nsinga beni.

⁷ Vayi mu lumbu kilanda, mu nkielo buisi, Nzambi wufidisa mua mvidi fikota mu nsinga ayi nsinga wuyuma.

⁸ Tala mabua muini buwuteba, buna Yave wubuela fidisa phemo yimvikanga tona ku ntotukilanga thangu, buna muini wu thangu wuyamisa ntu Yona, nate kalenzangana. Bulutidi mbote kudi minu mufua na mukala moyo.

⁹ Buna Nzambi wukamba Yona: «Dimbote vengi mu fuema mu diambu di nsinga dilengi?» Wuvutula: «Dimbote phengi mu fuema nate thombidi lufua.»

¹⁰ Vayi Yave wukamba: «Ngeyo mueni phasi mu finsinga dilengi fikambu kuna kuaku ayi fikambu menisa, fimenini mu builu bu mosi ayi wuyumini mu builu bumosi.

¹¹ Buna minu ndilendi mona kiadi mu diambu di Ninive ko, mbanza yinene yiwala batu viokila khama mosi ayi makumole ma mafunda ma batu bazimbulu suasisa lubakala ayi lumoso ayi kadi tanga bulu biyodama biwombo?»