Yona 1 - Bible en Kiyombe

Yona wuthota tina Nzambi

¹ Buna phova yi Yave yiyiza kudi Yona, muana Amitayi, mu khumbu yitheti, yikamba:

² «Telama ayi yenda ku Ninive, mbanza yinene ayi boka mu yawu bila mambi mawu matudidi va ntuala ami.»

³ Vayi Yona wutelama mu tina ku Talasi, va ntuala Yave. Landila dio, wukulumuka ku Yafo ayi wubata masuwa mabakuenda ku Talasi. Buna wufuta thalu mbongo zi kibila ayi wukulumuka muna mu kuenda ayi bawu ku Talasi, va ntuala Yave.

⁴ Ayi Yave yandi veka wutifidisa vuka kingolo va m'bu, ayi tembo kingolo kiba va m'bu. Mu diambu di masuwa, matula mu tezo ki diama.

⁵ Bisadi bi masuwa bamona wonga ayi batela bankaka mu kubasadisa, mutu mutu wutela nzambi andi. Ayi baloza mu m'bu bima biba mu masuwa muingi zitu ki dekula. Vayi Yona, niandi, wukulumuka kuna bandu dimasuwa, wulambalala ayi wuleka tulu tu vindu.

⁶ Landila dio, nanti wu masuwa wumfikama ayi wunkamba: «Mbi bidi yaku, nkua tulu? Telama, boka kudi nzambi aku! Bulendakana Nzambi yi kedika makatubambukila moyo ayi tusi bungana ko.»

⁷ Buna bakambasana mutu ayi mutu yandi: «Yizeno, tuteno wadi, muingi tuzaba mu bila kinani tubuilulu mu phasi ziazi.» Buna bata wadi, kutsuka wadi wubua mu Yona.

⁸ Banyuvula: «Tukubombidila, wutukambi mu bila ki nani tuekila mu phasi ziazi. Bisalu biaku mbi ayi kue bedi? Tiaku kue ayi kanda diaku kue?»

⁹ Buna Yona wubavutudila: «Minu, ndidi nyudayo, ayi ndivuminanga Yave, Nzambi yi (zulu), Yandi wuvanga m'bu ayi ntoto wuyuma.»

¹⁰ Buna babakala bamona wonga wu ngolo, ayi banyuvula diaka: «Mbi wuvengi kuna?» Bila batu bawa ti va ntuala Yave kabetina, bila bobo kabakamba .

¹¹ Ku zimunina, banyuvula: «Mbi tulenda kuvanga muingi m'bu wudingama mu diambu dieto?» Bila m'bu wutoma tombuka ngolo.

¹² Buna wubakamba: «Lundanguna ayi lundoza mu m'bu buna m'bu mawu dingama mu diambu dieno, bila nzebi ti mu bila kiami mupepe wungolo wawu wididi va beno.»

¹³ Vayi batu batomba bue buzibudila nzila va khati mayo muingi banata masuwa ku ntoto wuyuma, vayi basinunga ko, bila mbu wutatamana tombuka ngolo mu kubatedimina.

¹⁴ Buna baboka kudi Yave ayi bakamba: «Ah! Yave, tukubombidila, tumengi fua mu diambu di muela wu mutu wowo! Ayi kadi tula va ntu mieto menga makambulu bila, bila ngeyo, Yave wumvanganga boso butididi.»

¹⁵ Buna bananguna Yona, banloza mu mbu. Mu yo yawu thangu, m'bu wudingama mu nganzi ziandi.

¹⁶ Bu bamona bobo, batu bamona Yave wonga, ayi diawu bavana nkayilu kudi Yave ayi badia ndefi.