Nkunga mi Maniongo 2 - Bible en Kiyombe

Yave, nthatu wu Yelusalemi

¹ Yave, mu nganzi ziandi, Wufukidi mu matuti mandombe Muana wunketo wu Sioni! Tona ku zulu, wubuisidi Nzitusu wu Isaeli. Nganzi Andi bu yilema, Wuzimbakana kuandi ti Sioni Tudulu ki malu mandi.

² Yave, mu kondo ku kiadi, Wufukisidi mavia mamo ma Yakobi, Mu nganzi andi, wutuludi zinzo Zizio zisiama zi Yuda, Wulumbidi zio va tsi, Wubuisidi bimfumu Ayi mintinu, wumonisini mio tsoni.

³ Mu nganzi yingolo, wubuisidi Lulendo lulo lu Isaeli. Wumengi nuanina Isaeli nthatu Bu kayizidi. Vayi wulemisi Mbazu yiyokidi bibio bikinzungidila.

⁴ Banga nthatu, wulekidi mbasa andi, Wutukuni koko kuandi ku lubakala Ku kubama mu basula. Wukimonikisi nthatu eto, Bu kavondidi babo batunzolanga. Banga mbazu, wudukudi nganzi andi Mu kinlongo ki sioni.

⁵ Yave wukivengi banga nthatu eto. Wubungidi Isaeli ayi zinzo ziandi zizio, Wubungidi fulu biandi bibio Ayi nzo ziandi zizio zisiama Ayi wudukudi kiadi Ayi phasi va batu ba Yuda.

⁶ Wutuludi mu kingolo luphangu Lu lumbu, wutuludi fulu kiandi ki Mbuabununu. Mu Sioni, Yave wuzimbikisi bilumbu bi nyengo Ayi bi Saba. Mu khesi ziandi, Wuvuezidi ntinu ayi banganga.

⁷ Yave kakadi bue yangalala Zikua diandi, wubikidi kinlongo kiandi. Wuyekudi mu moko ma nthatu Zinzo zi kitoko zi Sioni Mu kinlongo biyoko biba Bingolo banga kuandi lumbu bi nyengo.

⁸ Yave wubaka lukanu mu tulula Bibaka bintaninanga Sioni. Wutitikidi nsinga mu teza, Kasi kekama ko mu tulula. Wutudidi mu mfuilu ntuala luphangu Ayi mbata luphangu, bilembo bebi.

⁹ Mielo mi Sioni mibuidi. Yave wumeni bunga mavitu, Wutoludi mawu. Ntinu ayi bilandi biandi Badi mu mioko mi ba nzenza. Ku siedi ko Nsiku ayi mimbikudi Miandi bakadi bue baka Mansueki ma Yave.

¹⁰ Bakulutu ba Sioni Bakedi va ntoto ayi badi nasui, Badukudi fundu fundu va ntu miawu, Bavueti minlele mi mfuilu. Ayi bandumba ba Yelusalemi Bayinikini ntu miawu va ntoto.

¹¹ Meso mami mavongidi mu totula Matsuela, ntima ami wulembo yami, Khondolo vuvu va ntuala phasi Zibuidi va batu bami, bila bantuena Ayi bana banyema balembo fue Mu nzala nlangu mu Zinganda zi mbanza.

¹² Bana balembo yuvudi ngudi ziawu: «Kue kuidi bidia ayi nlangu?» Bu balembo bue Banga batu baluala mu fulu Bi mbanza ayi Balembo tabuka vumunu mu mioko Mi ngudi ziawu.

¹³ Mbi ndilenda buela kukamba? Kudi nani ndilenda Kufuanikisa, Yelusalemi? Kifuani mbi ndilenda Bonga mu kubomba, Mbanza sioni? Kiadi kiaku Kidi tola banga Nlangu wu mbu, nani lenda kuniakisa?

¹⁴ Mimbikudi Miaku bakusamunini nsamu Mi luvunu ayi miphavala. Bakadi kutumbudila mambi maku Muingi phasi zibika kubuila, Nsamu awu kudi ngeyo wubedi Luvunu ayi fundu fundu mu meso.

¹⁵ Babo bamviokila vava balembo Siki tsaki mu diambu di mbuilu aku. Balembo siki mviosi ayi Balembo nikuni ntu Mu kuvueza, Yelusalemi: «Yayi kuandi mbanza Yibabetedilanga Kitoko Kiduka ayi kiese Ki ntoto wumvimba?»

¹⁶ Minthatu miaku mimio banyasanga Nua mu kithatu kudi ngeyo, Bansikanga mviosi wu tsisi Ayi bankuetanga meno, bankambanga: «Tuaminini! Kiaki lumbu Tube vingilanga, tutudidi kio, Tumueni kio!»

¹⁷ Yave wuvengi makakana, Wutunguni phova andi, yina Yikatuma tona mu tsi khulu: Wufukisidi mu kambu kiadi, Wukuvengi kiese ki nthatu aku, Wubuedidi ngolo zi minthatu miaku.

¹⁸ Ntima awu wunyamikinanga Kudi Yave. Kibaka ki Sioni, Bika matsuela maku Makumba banga nlangu wu Mbu phipa ayi muini! Kadi vunda, kadi vonga mu dila.

¹⁹ Telama, yamikina thangu Zizio va builu. Tengula ntima aku banga nlangu Va ntuala Yave! Tukuna Mioko miaku kudi yandi mu Tanina bana baku beti fua Mu nzala mu fulu bibio.

²⁰ Tala ayi mona, Yave, Nani wuvangidi maphila yayi! Bufueni ti bakheto badia bana Bawu bababuta ayi Babanzolanga ngolo? Bufueni ti Banganga zi Nzambi ayi mimbikudi Bavondo va fulu kinlongo?

²¹ Zimvumbi zi bantuena Ayi zi bakulutu zilekidi Va ntoto mu zinzila, ndumba Zami ayi matoko mami Babuidi mu sabala, ngeyo Wubavondidi mu lumbu Ki nganzi ziaku, Wubafukisidi mu kondo ku kiadi.

²² Wutumisini mu tsi zizio babo Bakumbonisanga tsisi, Banga mu lumbu ki nyengo. Mu lumbu ki nganzi zaku, Yave, Kuisi ko wuvukidi. Babo Ba ndiyundudi ayi bandi Bedizolanga, nthatu wubamanisi.