Luti 3 - Bible en Kiyombe

Luti lekidi va malu ma Boazi

¹ Naomi nzitu andi wukamba: «Muana ami wunketo, ndilendi ko kutombila fulu ki wulenda vundila muingi mamo mavioka mbote kudi ngeyo.

² Ayi buabu Boazi kasi ko butu kieto, niandi ayi bana bandumba babedi yaku? Wa, builu buabu maka veva olize va fulu ki yintutulungu.

³ Diawu fuiti yobila, wukiyukusa mafuta, bika wuvuata biyunga biaku ayi bika wukulumuka ku fulu kintutulungu olize. Kadi tia ti bakubakula kudi mutu nate kamanisini dia ayi nua.

⁴ Bu makaleka, tomba wuzaba fulu kikanleka ayi yenda bangula vunga ku wanda malu mandi ayi leka ayi makakamba niandi veka ma fuiti vanga.»

⁵ Buna Luti wunkamba: «Mamo mawukhembi, mandi vanga mawu.»

⁶ Wukulumuka va fulu kintutulungu olize ayi wuvanga mamo boso buntumina nzitu andi.

⁷ Mu thangu yoyo, Boazi wuba dia ayi nua, ayi ntima andi wutoma yangalala. Landila dio wuyeleka va ndambu dikuka di olize. Buna Luti wuyenda mu nsueki, wubangula divunga ku wanda malu ayi wuleka.

⁸ Mu ndingu tsi, bakala wutimuka. Wuyinama kuntuala ayi wumona, nketo wumosi wuleka kuwanda di malu mandi!

⁹ Buna Boazi wunyuvula: «Nge nani?» Buna wumvutudila: «Minu ndidi Luti sielo kiaku kinketo, fuiti yalumuna tsongi yunga kiaku va mbata kisadi kiaku, bila widi nkudi.»

¹⁰ Buna Boazi wukamba: «Bika Nzambi kakusakumuna, muana ami wunketo busongidi ntima aku wumbote mu khumbu yayi yinzole viokila yo yitheti, bukembo landakana ba matoko, baphutu voti bamvuama

¹¹ Vayi buabu , muana ami wunketo, kadi mona wonga. Mamo mawuntuba, mandi vangila mawu bila batu babo bankalanga va muelo mbanza bazebi ti widi nketo wulutidi wumbote.

¹² Vayi buabu, ti bukedika ndidi nkudi, nkudi wunkaka widi, butu kindutidi fikama.

¹³ Leka vava builu buabu, ayi tala mankuiza mbazi mu nsuka: Ti tidi kukula, diambu di mbote, kakukula. Vayi ti dikadi kunyangidika mu kukula, buna minu ndiela kukula, inga, mu kedika Yave bukadi moyo. Leka nate mu nsuka.»

¹⁴ Luti wutatamana leka va malu mandi nate mu nsuka, landila dio, wukotuka tekila bazabasana zizi mu zizi. Buna Boazi kasi zola ko bazaba ti muana nketo mosi wizidingi va fulu ki bantutilanga olize.

¹⁵ Buna wukamba: «Tuala yunga kivueti ayi yalumuna kiawu.» Buna Luti wuyalumuna kiawu. Buna wuteza tezo bisambanu bi olize ayi wuntambika biawu, landila dio wuvutuka ku mbanza.

¹⁶ Bu katula kudi nzitu andi, buna nzitu andi wunyuvula: «Bue buviokidi nsamu beni, muana ami wunketo?» Luti wunkamba mamo mamvangila Boazi.

¹⁷ Buna wunkamba: «Tezo biabi bi sambanu bi olize, vana kapheni biawu, bila wukhembi ndibika vutuka mioko na mioko kudi nzitu aku wunketo.»

¹⁸ Buna Naomi wukamba: «Bua ntima, muana ami wunketo, nate mawuzaba bue bunsukila nsamu beni bila bakala diodio dilendi bua ntima ko nate kamanisi nsamu mu lumbu kiaki kaka.»