Luti 2 - Bible en Kiyombe

Luti mu tsola Boazi

¹ Naomi wuba ayi butu ku ndambu bakala diandi, mutu wu ngolo ayi wu kimvuama, mu kanda di Elimeleki, zina diandi Boazi.

² Luti muisi Moabi wukamba Naomi: «Ndikubombidila, wuphani nsua muingi ndietoti zitheti mu landakana nio wulenda kufuila khenda.» Naomi wumvutudila: «Yenda kuaku, muana ami wunketo.»

³ Luti wuyenda toti mu tsola ku mbusa ba mimvedi. Bobo mu kambu zaba wukota mu tsola yivuiwulu kudi Boazi muisi kanda di Elimeleki.

⁴ Landila dio Boazi wuyiza botuka ku Betelemi ayi wukamba mimvedi: «Bika Yave kaba neno!» Bawu bamvuntudila: «Bika Yave kakusakumuna!»

⁵ Boazi wuyuvula sadi kiandi wuba mfumu mimvedi: «Nani vuidi muana ndumba wowo?»

⁶ Mfumu mimvedi wuvutula: «Muana ndumba wowo muisi Moabi wuvutukidi ayi Naomi botuka ku tsi Moabi.

⁷ Wulomba misua mu tota ku manima ma mimvedi. Mu nsuka wawu kizidingi ayi nate thangu yayi bosi kuandi kamevunda.»

⁸ Boazi wukamba Luti : «Wa mbote, muana ami wunketo, kadi kuetoti mu tsola mutu wunkaka, kadi bika fulu kiaki mu kuenda kunkaka, mawutatamana kala fika fika ayi matoko mami.

⁹ Toma zibula meso maku mu tala tsola yoyo yi bawu balembo vedi ayi fuiti kuenda ayi bawu ayi ngemona phuila nlangu, yenda vadi mimvungu ayi nua nlangu bisadi biami batekidi.»

¹⁰ Buna Luti wufukama ayi wuyinika zizi kiandi va ntoto. Ayi wukamba Boazi : «Bue mbonokono nlemvo mu meso maku muingi banzaba minu nzenza?»

¹¹ Boazi wumvutidila : «Bakhembi mbote mamo mawuvengi mu diambu di nzitu aku tona bakala diaku kafua ayi boso bu wubikila se diaku, ngudi aku ayi tsi aku yiwubutukila mu kuenda kudi batu bawuteka kambu zaba va thete.

¹² Bika Yave kakuvutudila mavanga maku mambote. Bika Yave kafuta mfutu wuduka, Nzambi yi Isaeli, ku tsi maveve mandi wuyiza tombila suamunu kiaku.»

¹³ Buna Luti wukamba: «Bika ndimonokono nlemvo mfumu ami bila tubidi kudi sielo kiaku mu mbembo yinlembami, ka diambu ko minu ndisi ko wumosi mu bisadi biaku bibaketo.»

¹⁴ Mu thangu dia, Boazi wukamba Luti : «Fikama vava, fuiti dia ndambu dipha ayi buika tini kiaku ki dipha.» Buna wukala va ndambu mimvedi, Boazi wuntambika zitheti zikangu ayi wudia, wuyukuta ayi ndambu yisiala.

¹⁵ Bosi wutelama mu kuetoti. Boazi wuvana thumunu kudi bisadi biandi, wubakamba: «Lum'bika katota va khati ayi bitsafi mu kambu kunzonzisa,

¹⁶ Lufuiti kumbotudila ndambu bitsafi phe bimalumvana kavela mu kambu kunsemba.»

¹⁷ Luti wutatamana tota nate mu masika ayi wututa bitsafi bi katota. Wubaka tezo ki efa kimosi ki olize.

¹⁸ Buna Luti wubonga yawu ayi wuvutuka ku mbanza ayi nzitu andi wumona biobio bikatota, bosi wutotula phe bidia bisiadidila bu kayukuta ayi wumvana biawu.

¹⁹ Nzitu andi wumyuvula : «Kue totidi ayi kue sadidi lumbu kiaki? Bika niowo wukumueni kiadi kasakumunu.» Yandi wukamba nzitu andi kudi nani kasadila ayi wunkamba ayi wukamba nzitu andi ti wusala mu tsola Boazi.

²⁰ Buna Naomi wukamba nzitu andi: «Bika kasakumunu kudi Yave wukambu yambulanga nlemvo andi kudi badi moyo ayi bafua! Bakala diodio widi wumosi mu minkudi mieto.»

²¹ Buna Luti muisi Moabi wubuela kamba: «Yandi wukhembi nditota ku manima ma mimvedi nate bamanisi kisalu ki ngionzoko.»

²² Naomi wukamba Luti, nzitu andi: «Bufueni, muana ami wunketo, wendanga wusala ayi bisadi bibaketo bi Boazi ayi babika kubuana mu tsola yinkaka.»

²³ Bobo Luti kasadila fika fika ayi bisadi bi baketo bi Boazi mu tota mbongo olize ayi mbongo witi nate ngionzokolo yimana. Vayi Luti wutatamana zinga ayi nzitu andi.