Luti 1 - Bible en Kiyombe

Elimeleki ayi nzo andi ku Moabi

¹ Buba mu thangu yina ba Zuzi babeyalanga Isaeli, nzala yibua mu tsi, ayi bakala dimosi dibotuka ku Betelemi mu Yuda wuyenda ayi nketo andi ayi bana bandi bole ba babakala mu tsi yi Moabi.

² Zina di bakala Elimeleki, zina di nketo Naomi, mazina ma bana bole bababakala Maheloni ayi Kilioni, bawu baba mu kanda di Efalata, ku buala di Betelemi mu Yuda. Buna batula ku tsi Moabi ayi bakala phe kuna.

³ Mu thangu yilanda, Elimeleki, bakala di Noami, wufua, buna Naomi wusiala niandi veka ayi bana bandi bole babakala.

⁴ Mu lumbu bilanda, bana beni ba babakala bakuela baketo basi Moabi. Wumosi zina diandi Olopa ayi wunkaka Luti. Bakala kuna kumi di mimvu.

⁵ Landila bilumbu biobio, bana babole ba babakala Maheloni ayi Kilioni phe bafua. Buna Naomi wusiala yandi mosi kadi bana bandi bole ba babakala ayi kadi bakala.

Naomi ayi Luti ku Betelemi

⁶ Buna wutelema, niandi ayi bazitu bandi ayi wutotuka ku buala bu Moabi, bila wuwa tsangu ti Yave wubuedi banzila batu bandi mu kubavana bidia.

⁷ Buna wubotuka va fulu kikaba ayi bazitu bandi bole baba yandi. Yandi ayi bazitu bandi bananguka mu vutuka ku Yuda mu tsi yi Isaeli.

⁸ Buna Naomi wukamba bazitu bandi bole: "Yendeno, vutukeno, mutu mutu ku nzo ngudi andi. Bika Yave kalusonga nlemvo banga beno bulusongele nlemvo kudi bobo bafuidi ayi kudi minu.

⁹ Bika Yave kaluvana nkayilu ayi lubaka fulu kivundila mutu mutu mu nzo bakala diandi". Buna wubabumba. Bawu batatu babokana dila.

¹⁰ Bazitu bandi baba kunkambanga: «Nana, beto tufuiti vutuka yaku kudi batu baku.»

¹¹ Vayi Naomi Wukamba : «Vutukeno, bana bami, bila mbi luzolele kuenda yami? Ndilenda buebaka buemba ayi buta bana ba babakala balenda kulukuela?

¹² Vutukeno, bana bami. Bila mbenunina ngolo muingi ndiba nkazi bakala dinkaka. Ka diambu ko ti ndilenda ba ayi bakala builu buabu ayi buta bana ba babakala,

¹³ Buna beno lulenda kueno kubavingila nate bam'ba bakulutu ? Mu diambu diawu maluvibidila mu kambu kuela? Nana! Bana bami ba baketo! Ndidi kingongo viokila beno bila koko ku Yave kutotukidi mu kunduanisa.»

¹⁴ Buna babokana dila diaka. Olopa wufifa nzitu andi besi vayi Luti wuntatimina.

¹⁵ Naomi wukamba Luti: «Tala mbanda aku difuola vutukidi kudi batu bandi ayi kudi zinzambi ziandi. Vutuka ayi mbanda aku difuola.»

¹⁶ Buna Luti wuvutula: " Kadi kukhomina mu kuyambula ayi minu ndivutuka bila koso ku wunkuenda kuna phe minu ndinkuenda, voso va wunleka vovo minu phe ndileka, batu baku mababa batu bami ayi Nzambi aku mayiba Nzambi ami.

¹⁷ Koso kuwumfuila, koko ndimfuila ayi vana phe ndiela ziamina. Bobo Yave kaphangila dio ayi kaluta dio vanga. Lufua kaka lulenda kutuvambisa, minu ayi ngeyo.

Naomi vutukidi ku Betelemi ayi Luti

¹⁸ Bu kamona ti Luti wuntatimina mu kuenda yandi, wulembo kuntatimisa.

¹⁹ Badiata bawu bole nate batula ku Betelemi. Bu bakota ku Betelemi, mbanza yiyo yiba niku niku mu diambu diawu ayi baketo bayuvasana: «Niandi nionio Naomi?»

²⁰ Naomi wubavutudila: «Kadi bue kuthedilanu Naomi, vayi luthedilanganu mala, bila Nkua lulendo wukitudi zingu kiami ndudi.

²¹ Ndiyenda ayi moko mawala vayi Yave wuphutudi mioko miphamba. Kadi buekuthedileno Naomi bila Yave wukhuludi ayi Nkua lulendo wuphangidi maphasi.»

²² Bobo Naomi kavutukila, niandi ayi Luti muisi Moabi, nzitu andi wunketo. Batula ku Betelemi mu thangu babevelanga olize.