1 Mose 9 - Bible en Kiyombe

Tsilulu yi Nzambi kudi Nowa

¹ Nzambi wusakumuna Nowa ayi bana bandi bababakala ayi wubakamba: «Butaneno, niekeno ayi wesanu ntoto wuwo.

² Tona buabu bulu bibio bi ntoto ayi zinuni zizio ku tsi zulu mabilutinanga wonga ayi tsisi bibio bindiatilanga mu vumu ayi mbizi zizio mu mbu biveno mu mioko mieno.

³ Bibio binkibanga ayi bidi moyo biawu mabiba bidia bieno banga kuandi ndiluvanina biti bikhunzu, bobo ndiluvanini bibio.

⁴ Vayi lubika dia nsuni widi moyo, bu dibangululu, widi ayi menga.

⁵ Vayi diaka manditomba menga meno, bu dibangudulu moyo eno. Manditomba wo kudi kioso bulu kimvonda mutu. Kudi woso mutu mandiyuvula moyo wu khomba andi.

⁶ Ti mutu tengudi menga Ma mutu wunkaka, Menga ma mutu wowo Phe mamatengulua kudi Ndiandi mutu, Bila Nzambi wuvanga Mutu mu kifuani kiandi.

⁷ Vayi kudi beno, butaneno, niekeno, tembakaneno va ntoto ayi funeno.»

⁸ Nzambi wukamba Nowa ayi bana bandi ba babakala:

⁹ «Ndieka mvanga nguizani yami ayi beno, ayi nkun'eno wukululanda

¹⁰ ayi bibio bidi moyo bi luzungididi: zinuni, bulu biyodama voti binsitu, dibangudulu ti bibio bitotuka mu masuwa ayi bibio bimvumunanga bikuiza zinganga va ntoto.

¹¹ Phengi nguizani yami ayi beno. Tona buabu, kadi vangu kimosi kidi moyo kilenda buela fukusu mu khuka nlangu ayi khuka nlangu yilendi buela ba ko mu bunga ntoto.»

¹² Nzambi wubuela kamba: «Tala, thudidi dimbu ki nguizani va khati ka minu ayi beno ayi bibio bidi moyo, thangu zizio nate mbandu zi nkuiza.

¹³ Thudidi mbumba nanga mu matuti, dimbu ki nguizani kudi minu ayi kudi ntoto. Mayiba dimbu kimbambulanga moyo mu nguizani yimphengi va khati minu ayi ntoto.

¹⁴ Mikutikisa matuti ma mvula va ntoto ayi mbumba nanga yimonikini mu matuti,

¹⁵ Mandibambukilanga moyo mu nguizani yami yindivanga ayi beno ayi ntindu mimio mi bibulu, kulendi buela ba khuka nlangu ko yilenda bunga batu.

¹⁶ Thangu zizio mbumba nanga bu yitotukidi mu matuti, bu mbueni yawu, buna mandibambukanga moyo mu nguizani yimvu ka mvu yindivanga va khati ka minu Nzambi ayi bibio bidi moyo va ntoto.»

¹⁷ Buna Nzambi wukamba Nowa: «Kiokio dimbu ki nguizani yindivanga va khati ka minu ayi bibio bidi moyo va ntoto.»

Bana batatu ba Nowa

¹⁸ Bana ba babakala ba Nowa batotuka mu masuwa bawu baba: Semi, Hami ayi Yafeti. Hami niandi wuba disa di Kanani.

¹⁹ Tona mu bana batatu baba ba Nowa, ntoto wuwala mu batu.

²⁰ Nowa wuba mutu wuthete mu kuna ndima yi vinu.

²¹ Lumbu kimosi , yandi wunua vinu, wukolo ayi wuvula minlele miandi mimio mu khati nzo andi yi ngoto.

²² Buna Hami, se di Kanani, wumona pheni yi se diandi ayi wukamba diawu kudi ba khomba ziandi zole baba ku nganda.

²³ Buna Semi ayi Yafeti, babonga yunga, batula kiawu va mavembo mawu, bawu babole va kimosi, bakota kimanima manima, bafuka pheni se diawu. Bavengumuna zizi biawu, muingi babika mona pheni se diawu.

²⁴ Thangu Nowa kakotuka ayi nkuiti bu wumana, wuwa mamvangila muana andi wutsuka.

²⁵ Wunkamba: «Bika Kanani kaba Mutu wusingu! Bika kaba mvika wu Bavika ba zikhomba ziandi!»

²⁶ Wukamba diaka: «Bika Yave, Nzambi Yi Semi, kasakumunu! Bika Kanani kaba mvika Semi!

²⁷ Bika Nzambi kayalumuna Yafeti, Bika kakalanga Mu zinzo zingoto zi Semi, Ayi Kanani kaba mvika Yafeti!»

²⁸ Nowa wuzinga diaka khama tatu ayi makumi matanu mamvu tona vana vabela khuka nlangu.

²⁹ Wuzinga khama vua makumi matanu mamvu ayi wufua.