1 Mose 7 - Bible en Kiyombe

Nowa kotidi mu masuwa

¹ Landila momo, Yave wukamba Nowa: «Kota mu masuwa, ngeyo ayi nzo aku yiyo, bila ngeyo kaka mbueni wusonga va meso mami mu batu ba thangu aku.

² Wukibongila mu bibulu bibio bivedila tsambudi di bibulu biole biole, mbakala ayi kheto. Vayi mu bibulu bilembolo vedila, bonga bibiole, kimbakala ayi kikheto.

³ Bonga mu zinuni phe, tsambudi md bibulu biole biole, mbakala ayi kheto, mu diambudi kambu sukisa nkuna va ntoto wumvimba.

⁴ Diambudi tsambudi yi bilumbu kaka yisiedi buna ndieka nokisa mvula va ntoto mu makumi maya ma bilumbu ayi makumi maya ma builu, ndieka fukisa bima bibio bindivanga va ntoto.»

⁵ Buna Nowa wuvanga mambu mamo nadede banga Nzambi kantumina.

Khuka nlangu yinene

⁶ Nowa wuba khama sambanu zimimvu mu thangu mvula ngolo, khuka minlangu bu ziyiza va ntoto.

⁷ Nowa wukota mu masuwa, niandi veka ayi bana bandi babakala, nketo andi ayi bazitu bandi mu tina khuka nlangu.

⁸ Mu bibulu bivedila ayi bikambu vedila, mu zinuni ayi bibio bindiatilanga mu vumu va ntoto,

⁹ biole biole, bimbakala ayi bikheto, bikota kudi Nowa mu masuwa, banga Nzambi katumina Nowa.

¹⁰ Lumbu tsambodi bivioka, khuka nlangu yiyiza fuka ntoto.

¹¹ Mu mvu khama sambanu zi Nowa, mu ngonda yinzole mu lumbu kikumi tsambudi mu ngonda, kiawu lumbu zi tho zizio zi phinda minlangu zizibuka, zi nela zi zulu phe zizibuka.

¹² Mvula yinoka va ntoto mu makumi maya ma bilumbu ayi makumi maya ma builu.

¹³ Mu lumbu beni, Nowa wukota mu masuwa ayi bana bandi ba babakala: Semi, Hami ayi Yafeti, nketo andi, ayi bazitu bandi batatu.

¹⁴ Ayi phila zizio zi bibulu binsitu, biyodama, bifioti binzanzalanga va ntoto, phila yi zinuni zizio, ayi bibio bintilumukanga bidi mavavi.

¹⁵ Biole biole, mu bibio bidi moyo, biyiza kudi Nowa mu khati masuwa.

¹⁶ Mintindu mimio mi bima bimvumunanga mbakala ayi kheto mikota banga butumina Nzambi kudi Nowa. Buna Yave wumbindikila muelo.

¹⁷ Khuka nlangu yizingila va ntoto mu makumi maya ma bilumbu. Nlangu wuwala ayi wunanguna masuwa ayi mawu malalama va mbata nlangu wuba va ntoto.

¹⁸ Nlangu wuwala mu ngolo zizio, wukuma ngolo va ntoto, ayi masuwa malalama va mbata minlangu.

¹⁹ Nlangu wuluta kuma mu ngolo zizio va ntoto. Miongo mimio minda ku tsi zulu mimana diama.

²⁰ Nlangu wukuma viokila metele tsambudi va yilu miongo ayi miongo mifukama mu nlangu.

²¹ Buna bibio biba moyo va mbata ntoto ayi bindiatanga: zinuni, bibulu biyodama ayi binsitu, bifioti bindiatilanga mu vumu va ntoto bimana fua ayi batu babo.

²² Bibio bimvumunanga ayi biba va ntoto wuyuma, bifua.

²³ Nzambi wufukisa bibio biba va mbata ntoto: tona mu batu nate mu bibulu ayi mu zinuni zintilumukanga bimana fukila va ntoto, vayi Nowa kaka wuvuka ayi babo baba yandi mu masuwa.

Nowa totukidi mu masuwa

²⁴ Nlangu wutatamana wala va ntoto mu khama mosi ayi makumi matanu ma bilumbu.