1 Mose 6 - Bible en Kiyombe

Nzambi keni mu fukisa batu

¹ Mu thangu batu batona woka va ntoto ayi bana babaketo babutu kudi bawu,

² bana ba Nzambi bamona ti bana babaketo babatu baba bakitoko ayi bakuela babana babasola mu bawu.

³ Buna Nzambi wukamba: «Pheve ami yilendi kala mu mutu thangu zioso ko, bila lumbu kidi mutu wela fua ayi tona buabu, makazinga khama mosi ayi makumi mole mamvu.»

⁴ Mu thangu yina, kuba ba Nefili va ntoto, ayi phe landila bana ba Nzambi bu babundana ayi bana ba bakheto ba batu ayi bu bababutila bana. Baba babakala ba ngolo mu tsi khulu.

⁵ Nzambi wumona ti mambi ma batu mayiza ba mawombo va ntoto, mabanza ma ntima miawu maba mambi ayi makani mawu maba mu vanga kaka mambi.

⁶ Diawu Yave wunionga bukavanga mutu va ntoto. Ntima andi wunionga ngolo.

⁷ Yave wukamba: «Ndieka mfukisa va ntoto mutu wundivanga, tona mu mutu tii bibulu bi fioti ayi binene, ayi zinuni zi zulu, bila ndiongini bu ndibivanga.»

⁸ Vayi Nowa wumonokono nlemvo va meso ma Yave.

Nzambi keni mu vukisa Nowa

⁹ Tala nsamu wu kikhulu ki kanda di Nowa. Nowa wuba mutu wulunungu ayi wusonga va khati batu baba mu thangu andi. Nowa wudiata mu kithuadi ayi Nzambi.

¹⁰ Wubuta bana batatu babakala: Semi, Hami ayi Yafeti.

¹¹ Ntoto wuluta biva va meso ma Nzambi ayi wuwala khemi mumoso.

¹² Nzambi wutala ntoto ayi wumona ti wuwo wuba wubiva, bila nsuni mimio miba khadulu yimbi va ntoto.

¹³ Buna Nzambi wukamba Nowa: «Mbeki lukanu mu fukisa batu babo va ntuala ami, bila ntoto wufulukidi mu khemi mu diambu diawu ndieka kubafukisa va ntoto.

¹⁴ Wukivangila masuwa ma mabaya mangolo, mu mawu, tula bivinga ayi vaba mawu bitima mu khati ayi ku nganda.»

¹⁵ Tala phila mafueti bela: Maba khama mosi ayi makumi matanu ma metele mu kula, makumi mole tanu ma metele mu siadila ayi kumi tanu zi metele mu kunzama.

¹⁶ Mawufuka masuwa muanzu, ayi bika divuasa di khati tsika metele tona ku muanzu nate ku ndambu yi masuwa. Mawutula mwelo ku ndambu mosi yi masuwa. Mawutula etaze yithete, yinzole ayi yintatu mu mawu.

¹⁷ Tala, minu, ndieka nokisa mvula yingolo, khuka nlangu, va ntoto mu bunga bibio bimvumunanga ku tsi zulu. Bibio bidi va ntoto mabifukusu.

¹⁸ Vayi ndieka mvanga nguizani ami ayi ngeyo. Mawukota mu masuwa, ngeyo, bana baku bababakala, nketo aku ayi bazitu baku.

¹⁹ Mawukotisa phe mu masuwa bulu biole biole, mbakala ayi kheto, mi ntindu mimio mi bibio bimvumukanga muingi bivuka va kimosi ayi ngeyo.

²⁰ Mu kadika ntindu mi zinuni, zi bibulu, bifioti ayi binene, biza biole biole va widi muingi bivuka.

²¹ Buabu ngeyo, bonga mu bibio bindiwungu, tula bio va widi muingi biba khuta kudi ngeyo ayi kudi bawu.

²² Bobo Nowa kavanga. Wuvanga mambu mamo nadede banga Nzambi kantumina.