1 Mose 50 - Bible en Kiyombe

Matanga ma Yosefi

¹ Yosefi wubua va zizi ki se diandi, wudila va ntuala andi ayi wumbumba.

² Buna Yosefi wutuma bisadi biandi, ba minganga bayumisa nitu se diandi. Bayumisa nitu Isaeli,

³ Makumi maya ma bilumbu biduka mu diambu diandi, bila yoyo yiba thalu bilumbu mu yumisa nitu, ayi basi ngipiti batotula matsuela mu diambu diandi mu makumi tsambudi di bilumbu.

⁴ Ku tsuka, lumbu bi bandidila bivioka ayi Yosefi wukamba basi nzo yi Falao, wukamba: «Ti ndimonokono nlemvo mu meso meno, kambeno, ndikulubombidila, mu matu ma Falao buabu:

⁵ “Tekila kafua, se diami wundikisa ndefi mu nkuzikila mu tsi Kanana mu biziami bikakubika. Wuphana nsua ndieziki buabu, bosi mandivutuka.”»

⁶ Falao wumvana nsua mu kueziki se diandi boso bukadila dio ndefi.

⁷ Yosefi wukuma ku Kanana muingi kazika se diandi ayi bisadi bi Falao, bakulutu ba nzo andi ayi bakulutu babo ba Ngipiti,

⁸ Ayi nzo yiyo yi Yosefi, bakhomba ziandi zi babakala ayi nzo yi se diandi. Wubika kaka mu tsi Ngoseni batekolo bawu, bibulu biawu bi fioti ayi bibulu biawu binene.

⁹ Va kimosi ayi yandi mukuma phe makalu ayi minati mi kavalu, ayi fulu kiwala batu baphuele.

¹⁰ Ayi batula va fulu ki Atadi: «“Fulu ki lusende”» kidi mu zunga ki Yodani, vana badila ngolo ayi mu diambu di se diandi bi lumbu tsambudi.

¹¹ Buna basi tsi, basi Kanana, bamona ntindu matanga va fulu kintutulungu mbongo ki Atadi, ayi bayamikina: «Matanga manene ma basi Ngipiti! Diawu batedila fulu beni mu zina di Abeli-Mitsilayimi, fulu beni kidi mu zunga ki Yodani.»

¹² Buna bana bandi babakala bavanga mu diambu diandi banga bukabakambila.

¹³ Bana bandi ba babakala banata mu tsi Kanana ayi banzika mu phaka matadi yi tsola Makapela, tsola Abalahami kasumba kudi Efeloni muisi Heti, banga mvuilu biziami, fika fika ayi Mamele.

¹⁴ Bu kamana zika se diandi, Yosefi wuvutuka ku Ngipiti, yandi ayi zikhomba ziandi zi babakala, ayi babo bakuma yandi mu zika se diandi.

Yosefi lemvukidi bakhomba ziandi

¹⁵ Zikhomba zi babakala zi Yosefi bu bamona ti se diawu fuidi, bakamba: «Bulendakana ti Yosefi wutulundidi nganzi ayi kalendi kambu kutu vutudila ko mambi matumvangila.»

¹⁶ Buna bafidisa thumu kudi Yosefi banga buabu: «Se diaku wuvana thumunu tekila kafua, wukamba:

¹⁷ “Tala mama lukamba Yosefi: Ndikubombidila, lemvukila mbimbi yi bakhomba ziaku ayi disumu diawu, bila dimbimbi bakuvangila.” Ndikubombidila, lemvukila buabu disumu di bisielo bi Nzambi yi se diaku.» Yosefi wudila bu kawa bobo.

¹⁸ Landila dio, zikhomba ziandi zi babakala bayiza phe, babua va ntuala andi ayi bakamba: « Tuidi bavika baku.»

¹⁹ Vayi Yosefi wubavutudila: «Kadi moneno tsisi, bue, va fulu ki Nzambi ndidi?

²⁰ Lukana mu kuphangila mambi vayi Nzambi wusekula mawu mu mambote mu nungisa mambu ma lumbu kiaki, mu tanina mioyo mi kanda diphuele.

²¹ Buabu, kadi moneno tsisi. Manditatamana minu veka mu kuluvana bimvukila beno ayi makanda meno.» Bobo kababombila ayi kubakambila mu mbembo yinlembami.

Tsukulu yi luzingu lu Yosefi

²² Ayi Yosefi wutatamana kala ku Ngipiti, yandi ayi nzo yi se diandi, Yosefi wuzinga khama mosi ayi kumi di mimvu.

²³ Buna Yosefi wumona bana ba Efalayimi yi mbandu yi ntatu ayi bana ba Makila, muana Manase. Babutukila va makuma ma Yosefi.

²⁴ Ku zimunina, Yosefi wukamba zikhomba ziandi: «Ndilembo yendi ku lufua, vayi Nzambi kelendi kondo kulubanzila ko, ayi mu kedika, wela kulu tombula tona mu tsi yayi nate mu tsi yikadila Abalahami ndefi, kudi Isaki ayi Yakobi.

²⁵ Dieno ndefi mu nata nitu ami, Nzambi bukela kulubambukila moyo.»

²⁶ Landila dio, Yosefi wufua bu kazinga khama ayi kumi di mimvu, bayumisa nitu andi ayi bantula mu khelo ku Ngipiti.