1 Mose 48 - Bible en Kiyombe

Yakobi wusakumuna bana ba Yosefi

¹ Landila mambu momo, bakamba Yosefi ti se diandi wubabela. Wuyenda ayi bana bandi bole, Manase ayi Efalayimi.

² Bu bakamba Yakobi ti muana andi Yosefi wizidi mu nkutala, Yakobi wusa ngolo ayi wukala va mbuka.

³ Buna Yakobi wukamba Yosefi: «Nzambi Mpungu-Tulendu wumbonikina ku Luzi, mu tsi Kanana ayi wutsakumuna.

⁴ Buna wukhamba: “Mandikuvana mbutu, mandikuniekisa ayi mandikukitula lukutukunu lu batu, mandivana tsi yayi kudi nkuna aku wunkuiza boso mvuilu mu thangu zizo.”»

⁵ Yakobi wubuela kamba: «Buabu bana baku bole babakala ba wubutidi mu tsi Ngipiti tekila ndiza kudi ngeyo ku Ngipiti, minu phuidi. Efalayimi ayi Manase mababa bami banga Lubeni ayi Simeoni.

⁶ Vayi nkuna aku, wowo wumawubela se ku mbusa awu, wela ba waku. Mu thangu yo yawu zina di bakhomba ziawu zi babakala, maditangulu mu difua diawu.

⁷ Mu diambu diami, bu ndiba ku Paddani, Lakheli wufua va ndambu ami, mu tsi Kanana, mu nzila, ka diambu ko tini kinene ki tsi kiba tekila mu tula ku Efalata, diawu ndizikila vana, mu nzila Efalata, dibangudulu Betelemi.»

⁸ Buna Yakobi wumona bana ba Yosefi ayi wukamba: «Banani baba?»

⁹ Yosefi wuvutula kudi se diandi : «Bana bami Nzambi kapheni va fulu kiaki.» Buna wukamba: «Wundatina bawu, ndikubombidila, muingi ndibasakumuna.»

¹⁰ Meso ma Isaeli mavonga mu diambu di bununu. Kalendi bue mona ko. Wubafikika va kaba, wubabumba ayi wubabumba ngolo.

¹¹ Landila dio, Isaeli wukamba Yosefi: «Ndisileka minu ko ti ndilenda bue mona zizi kiaku, vayi tala Nzambi wumbonisini na nkuna aku.

¹² Landila dio, Yosefi wubatotula mu makuma mandi ayi wufukama va ntoto.

¹³ Buna Yosefi wubabonga bawu bole, Efalayimi mu koko ku lubakala va lumoso lu Isaeli, ayi Manase mu koko ku lumoso, va lubakala lu Isaeli, wubafikika.

¹⁴ Vayi Isaeli wutukuna koko kuandi ku lubakala ayi wutula ko va ntu Efalayimi, ka diambu ko yandi wuba nleki, ayi koko kuandi ku lumoso va mbata ntu Manase. Mu bila ki diambu katudila moko mandi phila yoyo, bila Manase wuba muana wuteka butuka.

¹⁵ Wusakumuna Yosefi ayi wutuba: Nzambi yisadila mase mami Abalahami ayi Isaki, Nzambi yindikila Zingu kiami kikio, Nate lumbu kiaki,

¹⁶ Mbasi yithanina Mu ziphasi, Sakumuna matoko Mama Ayi phe Bika zina diami Disanusunua mu bawu Ayi zina di Mase Mami, Abalahami ayi Isaki ayi banieka Nate babedi Mafunda mu tsi.»

¹⁷ Mu thangu Yosefi kamona ti se diandi wusimbidila koko kuandi va mbata ntu Efalayimi, disi kunyangidika ko, ayi wutomba simba koko ku se diandi mu botula ko va mbata ntu Efalayimi ayi tula ko va mbata ntu Manase.

¹⁸ Buna Yosefi wukamba se diandi: «Buisi ko buawu, se diami, bila niandu, yandi wutuama butuka. Tula koko kuaku ku lubakala va mbata ntu andi.»

¹⁹ Vayi se diandi wumanga ayi wutuba: «Nzebi, muana ami wu bakala, nzebi. Yandi phe wela ba kanda, ayi yandi phe wela ba wunene. Vayi khomba andi yi nleki wela nkulutila munene, ayi nkuna andi wela ba wuwala makanda.»

²⁰ Buna wutatamana kubasakumuna lumbu kina, wukamba: « Mu nzila aku bika Isaeli ka buela Sakumuna mu tuba buabu: “Bika Nzambi kakuvangila banga Efalayimi ayi Manase!”» Bobo katula Efalayimi va ntuala Manase.

²¹ Buna Isaeli wukamba Yosefi : «Tala, ndilembo fue, vayi kedika, Nzambi makaba neno ayi wela kuluvutula mu tsi bakulu beno.

²² Vayi minu, inga, ndikuveni va mbata zikhomba ziaku tini ki tsi ki ndiziona mu koko ku ba Amolita mu sabala kiami ayi mu mbasa ami.»