1 Mose 46 - Bible en Kiyombe

Yakobi wuyenda ku Ngipiti

¹ Isaeli ayi batu bandi babo ba kavua bayenda ayi batula ku Beli-Seba, ayi wuyoka minkayilu kudi Nzambi yi se diandi, Isaki.

² Buna Nzambi wumokana ayi Isaeli mu mona-meso, va builu. Wukamba: «Yakobi! Yakobi!» Yakobi wuvutula : «Minu niandu, ndilembo kuwe»

³ Nzambi wubuela tuba : «Minu Nzambi, Nzambi se diaku yi se diaku. Kadi mona tsisi mu kulumuka ku Ngipiti, bila kuna mandikitula kanda diaku dineni.

⁴ Minu veka mandikulumuka yaku ku Ngipiti ayi minu veka phe ndiela buekukumisa mu kedika ayi Yosefi wela zima meso maku.»

⁵ Landila mambu momo, Yakobi wutelama ayi wuyenda ku Beli-Seba ayi bana ba babakala ba Isaeli banata Yakobi, se diawu, bana bawu, ayi bakazi bawu, mu makalu momo Falao kafidisa mu ku banatina.

⁶ Diaka, banata bibulu biawu ayi bima biawu, biobio bi bakupika mu tsi Kanana. Ku zimunina, batula ku Ngipiti. Yakobi ayi nkuna andi ayi niandi.

⁷ Wukotisa ayi niandi ku Ngipiti ayi bana bandi bababakala, ayi batekolo bandi bababakala, bana bandi babaketo ayi batekolo bandi babaketo, inga, nkuna andi wuwo.

Kanda di Yakobi

⁸ Tala mazina ma bana ba babakala ba Isaeli, bana bobo ba Yakobi, bakota ku Ngipiti : Yakobi ayi bana bandi ba babakala: muana wu bakala wuthete mu butuka wu Yakobi wuba Lubeni.

⁹ Ayi bana ba babakala ba Lubeni baba: Hanoki, Palu, Heseloni, Kalami.

¹⁰ Ayi bana ba Simeoni baba: Yemueli, Yamini, Ohadi, Yakini, Sohali, Sauli, muana bakala wubuta nketo muisi Kanana.

¹¹ Ayi bana ba babakala ba Levi baba: Ngelesoni, Kehati ayi Melali.

¹² Ayi Bana bababakala ba Yuda baba: Ele, Onani, Sela, Pelesi, Zela. Vayi Ele ayi Onani bafua mu tsi Kanana. Ayi bana ba Pelesi baba: Heseloni ayi Hamuli.

¹³ Ayi bana ba Isakali baba: Tola, Puva, Yobi ayi Similoni.

¹⁴ Ayi bana ba Zebuloni baba: Seledi, Eloni ayi Yaheleli.

¹⁵ Bawu bana ba Leya kabutila Yakobi ku Padani-Alami, ayi muana andi wunketo Dina. Miela mimio mi bana bandi ba babakala ayi bana bandi ba baketo miba thalu makumi matatu ayi miela mitatu.

¹⁶ Bana ba Ngadi baba:Tsifioni, Hangi, Suni, Eseboni, Eli, Alodi ayi Aleli.

¹⁷ Bana bababakala ba Aseli baba: Yimina, Yisiva, Yisivi ayi Belia ayi Sela wuba busi kiawu. Ayi bana ba Belia baba: Hebeli ayi Malakieli.

¹⁸ Bawu bana ba Zilipa, niowo Labana kavana muana andi wunketo Leya. Mu thangu yilanda Zilipa wubutila Yakobi bana: kumi miela misambanu.

¹⁹ Bana ba babakala ba Lakheli, nkazi Yakobi baba: Yosefi ayi Benyamini.

²⁰ Ayi Yosefi wubuta mu tsi Ngipiti: Manase ayi Efalayimi bobo bambutila Asinati, muana wu nketo wu Potifela, nganga nzambi yi Oni.

²¹ Ayi bana ba Benyamini baba: Bela, Bekeli, Asabeli, Ngela, Naamani, Ehi, Losi, Mupimi, Hupimi ayi Aladi.

²² Bawu bana ba babakala ba Lakheli kabutila Yakobi. Miela mimio miba thalu, kumi ya.

²³ Ayi muana wu bakala wu Dani: Husimi.

²⁴ Ayi bana ba Nefatali baba: Yaheseli, Nguni, Yeseli ayi Silemi.

²⁵ Bawu bana ba babakala ba Bila, niowo Labani kavana kudi muana andi wu nketo Lakheli. Mu thangu yilanda, wubavana kudi Yakobi, miela mimio miba thalu tsambudi.

²⁶ Miela mimio miyiza kudi Yakobi mikota ku Ngipiti miba miomio mitotukila mu bunda bunda diandi, mu kambu tanga bakazi ba bana ba babakala ba Yakobi. Miela mimio miba thalu makumi ma sambanu ayi sambanu.

²⁷ Ayi bana ba babakala ba Yosefi ba butukila: miela miole. Miela mimio mi nzo Yakobi mikota ku Ngipiti miba thalu lusambudi.

Yakobi ayi kanda diandi bakala ku Ngipiti

²⁸ Ayi wufidisa Yuda ku ntuala andi kudi Yosefi mu kunkamba tsangu ti tuemi ku Ngoseni. Ku landa, bakota mu tsi yi Ngoseni.

²⁹ Buna Yosefi wukubikisa dikalu ayi wukuma mu kuebuani Isaeli se diandi, ku Ngoseni. Bu katula va ntuala andi mu thangu yo yawu, wunzinga mu dinga ayi wudila va mioko miandi mu thangu yinda.

³⁰ Ku zimunina, Isaeli wukamba Yosefi: «Buabu, khubamene mu fua, mu thangu yayi mbemona zizi kiaku, bila wukhidi moyo.»

³¹ Buna Yosefi wukamba bankhomba ziandi zi babakala ayi basi dikanda di se diandi: «Bika ndikuma mu kuelubula Falao ayi ndinkamba ti bakhomba ziami zi babakala ayi dikanda di se diami, babedi mu tsi Kanana, bizidi kuaku kudi minu.

³² Babakala bobo badi mimvungi ayi mintuidi mi bibulu ayi baneti kuaku bibulu biawu bi fioti ayi bibulu biawu bineni, ayi bibio biawu.

³³ Ayi tala malenda kuiza: Mu thangu Falao ma kalutela, inga mu thangu makatuba bisalu mbi lunsalanga,

³⁴ lunkamba ti sielo luidi mintuidi mi bibulu tona kimuana kieno nate buabu, beto banga bakulu beto, mu diambu di lukala mu tsi Ngoseni, bila woso mvungi mameme kazolakananga ko kudi basi Ngipiti.»