1 Mose 44 - Bible en Kiyombe

Yosefi wuthota zikhomba ziandi

¹ Ku landa, Yosefi wuvana thumunu kudi nkulutu nzo andi, wukamba: «Wesa bimvukila mu zitsaku zi babakala baba, kioso tezo kibalenda nata, ayi tula mbongo zi mutu mutu va ntu tsaku andi.

² Vayi mbungu ami, mbungu yi palata, fuiti tula yawu va ntu tsaku yi muana wu nleki, ayi zimbongo zi witi kiandi.» Wuvanga boso bunkambila Yosefi.

³ Buisi bukia bu basindika babakala, bawu ayi ziphunda ziawu.

⁴ Batotuka mu mbanza. Basi bawu thama ko mu thangu Yosefi kakamba nkulutu nzo andi: «Telama! Landakana babakala bobo, wubabakidila ayi wubakamba: “Bila mbi luvutudi mambi mu mambote?

⁵ Lusi yiba ko mbungu yinuinanga mfumu ami ayi yinkabikudilanga mambu? Diambu dimbi luvengi.”»

⁶ Ku zimunina, wubabakidila ayi wubakamba ziphova beni.

⁷ Vayi bamvutudila: «Bila mbi mfumu ami kafuiti tubila phila yayi? Dilendi banzulu ko ti bi sielo biaku balenda vanga diphila yayi.

⁸ Talanu, mbongo zitumona va ntu zi tsaku zeto, tukunatina zo tona ku Kanana. Bue tulenda yibila mbongo voti wola mu nzo mfumu aku?

⁹ Woso mu bisielo biaku wumonokono kima, kafua ayi bika beto tukituka beto veka bavika ba mfumu ami.»

¹⁰ Wuvutula: «Bika diba banga buididi phova zieno. Niowo kudi niandi kumonikina kima makaba mvika ami, vayi beno, malukondo bila.»

¹¹ Buna bakulula zi tsaku ziawu mu nsualu va ntoto mutu ayi tsaku andi ayi mutu mutu wuzibula tsaku andi.

¹² Wutoma tsiata mbote. Wutonina kudi lutidi bukulutu ayi wumanisina kudi lutidi buleki. Ku zimunina, mbungu yimonikina mu tsaku Benyamini.

¹³ Buna Bakakuna biyunga biawu, babuela tula mimfuna mutu mutu va phunda andi ayi bavutuka ku mbanza.

Yuda wunuanina Benyamini

¹⁴ Buna Yuda ayi zikhomba ziandi zi babakala bakota mu nzo Yosefi, Yosefi bu kakhidi muna, babua va ntoto va ntuala andi.

¹⁵ Buna Yosefi wubakamba: «Diambu mbi luvengi? Lusizaba ko ti mutu banga minu nzebi bikula mambu bu mbote?»

¹⁶ Vana Yuda wuyamikina : «Mbi tulenda tuba kudi mfumu eto? Bue tulenda tubila? Ayi bue tulenda monisa ti tuidi batu ba lunungu? Nzambi wumueni nzimbala yi bavika baku. Tala buabu tueka bavika ba mfumu ami, ayi beto, ayi niowo mu koko kuandi kumonokono mbungu.»

¹⁷ Vayi wukamba: «Dilendi banzulu ko ti ndilenda vanga diambu diodio! Bakala niowo mu koko kuandi kumonokono mbungu, niandi ma kaba mvika ami. Vayi beno banka, kumeno mu yenge kudi se dieno.»

¹⁸ Buna Yuda wufikama va kaba ayi wukamba: «Lemvuka, mfumu ami, ndikubombidila, bika mvika aku katuba diambu mu matu ma mfumu ami, mukambu lemisa nganzi zaku kudi sielo kiaku, bila kudi ngeyo yidi kuandi banga kudi Falao.»

¹⁹ Mfumu ami wuyuvula kiuvu kudi beto bavika baku ti tubeki se ayi khomba yinleki.

²⁰ Tuvutula: «Tubeki se di nuna ayi muana wu bununu buandi, lutidi buleki. Vayi khomba andi yibakala wufua, wusala niandi veka mu ngudi andi, ayi se diandi wunkuzolanga.»

²¹ Buna wutukamba: «Lunnata kudi minu, thidi kummona.»

²² Vayi tukuvutudila ti ditoko kalendi bika se diandi ko; ti bikidi se diandi, buna se diandi kafuiti fua kaka.

²³ Buna wutukamba ti kulendi bue kutuyakula ko ti nleki eto kakadi kuiza neto.

²⁴ Ayi diyiza ba ti tukuma kudi sielo kiaku, se diami ayi tuntudisila ziphova zi mfumu ami.

²⁵ Se dieto wutukamba tuvutuka mu sumba bidia.

²⁶ Vayi tunkamba: «“Tulendi kuenda ko; ti nleki eto wele neto tulenda kuenda, vayi tulendi monika ko vantuala mutu wowo ti nleki eto kakadi kuenda neto.”»

²⁷ Buna sielo kiaku, se diami, wutukamba: «“Beno luzebi mboti ti nketo ami wumbutila kaka bana bole babakala.

²⁸ Wumosi mu bawu wuzimbala; ndibanza ti bulu kitsisi kinkakuna ayi ndisi buekumona ko nate buabu.

²⁹ Ti lubuedi nata yandu thama va meso mami ayi ti kisumbula ki mfuilu kizidi va yandi mu kedika, buna malukulumuna, mu kiadi tsuki ziami zi phembe mu tsi bafua.”»

³⁰ Buna buabu, mitula kudi sielo kiaku, se diami, ditoko mu kambu ba ayi beto, muela wu wumosi buwidi wukangama ayi muela wu wunkaka,

³¹ Buna tala mafuiti kuiza bua kaka: niandi tumbu mona ti ditoko kasi ko vana, makafua, ayi sielo biaku mabakulumuna mu kedika, tsuki ziphembe zi sielo kiaku, se dieto mu kiadi mu tsi bafua .

³² Bila mvika aku wuyikidi nkebi wu ditoko, yandi ba thama ayi se diandi, bu kakamba: «“Ti khembo kumvutula, mandivola nkanu kudi ngeyo thangu zizio.”

³³ Buabu ndikubombidila, bika sielo kiaku kasiala va fulu ki ditoko banga mvika, muingi ditoko kakuma ayi zikhomba ziandi zi babakala.

³⁴ Bue fuiti kumina kudi se diami ditoko mu kambu ba yami, mbengi mona phasi zilenda kuiza kudi se diami.»