1 Mose 42 - Bible en Kiyombe

Yakobi wufidisa bana bandi ku Ngipiti

¹ Yakobi wuzaba ti witi yiba ku Ngipiti. Buna Yakobi wukamba bana bandi: «Bila mbi lutalasene wumosi ayi wunkaka?

² Nguilu ti witi yidi ku Ngipiti. Kulumukeno kuna ayi sumbano witi kuna, muingi tubika fua.»

³ Buna kumi di zikhomba zi Yosefi bakulumuka mu sumba mbongo ku Ngipiti.

⁴ Vayi Yakobi kasi fidisa ko Benyamini, khomba Yosefi va kimosi ayi bakhomba ziandi zinkaka, bila wukamba: « Tsisi ndimona ti kisumbula ki mfuilu kim'buila.»

⁵ Bana ba babakala ba Isaeli batula ayi batu bankaka bayiza yawu mu sumba, bila nzala yiba mu tsi Kanana.

Yosefi ayi zikhomba ziandi

⁶ Buna Yosefi wuba nkulutu wu luyalu ku Ngipiti. Yandi wubatekanga witi kudi batu babo ba tsi zizio. Zikhomba zi Yosefi batula ayi babuongama va ntuala andi zizi va ntoto.

⁷ Yosefi bu kamona zikhomba ziandi, wutumbu kubazaba, vayi wukitula mutu wukambu zabakana kudi bawu. Wubatubisa mu kingolo ayi wubakamba: «Kue lubedi?» Bavutula: «Mu tsi Kanana, mu sumba bimvukila.»

⁸ Buawu Yosefi kazabila zikhomba ziandi, vayi bawu basikunzaba ko.

⁹ Yosefi wuvika bambuka moyo mu zindozi zikaloto mu diambu diawu, wubuela kubakamba: «Luidi mineki!» Luyizidi mu tala fulu bi zibuka bi tsi!

¹⁰ Buna bankamba: «Nana, mfumu eto, bisadi biaku biyizidi mu sumba bimvukila.

¹¹ Tuidi bana ba babakala ba bakala dimosi. Tuidi batu basungama. Bisadi biaku basi ko mineki.»

¹² Vayi wubakamba: «Buisi ko buawu, luyizidi mu tala bifulu bizibuka bi tsi.»

¹³ Mu diawu bavutula: «Bisadi biaku bidi kumi ayi zi zikhomba zole. Tuidi bana ba se dimosi mu tsi Kanana. Ayi tala ti lutidi nleki widi buabu ayi se dieto, vayi wunkaka kasi ko.»

¹⁴ Vayi Yosefi wuvutula: «Diawu ndilukembi ti luidi mineki!

¹⁵ Mu diawu, malufiongonono. Bu kedika Falao bukadi moyo, lulendi totuka ko vava muaki ti lukikinini ti nleki eno wu bakala kiza vava.

¹⁶ Fidiseno wumosi mu beno muingi kenda tombi khomba eno wubakala, vayi beno malukangama, muingi phova zieno zifiongonono, mu zaba ti kedika mu diambiu dieno. Vo ka buawu ko, mu kedika Falao bu kadi moyo, luidi mineki.»

¹⁷ Wubatula mu buloko lumbu bitatu.

¹⁸ Mu lumbu kintatu Yosefi wubakamba : «Vangeno diadi muingi luzinga. Ndivuminanga Nzambi.

¹⁹ Ti luidi babakla basungama, bika wumosi mu khomba zeno kaba wukangama mu nzo eno yi buloko, vayi beno bankaka, nateno witi mu diambu di nzala yidi mu zinzo zeno.

²⁰ Buna lundatina lutidi nleki eno muingi phova zeno zilenda lekolo minu, ayi lulendi fua ko. Buna bavanga bo.»

²¹ Bayuvusana bawu na bawu: «Kedika, tuvuka mambu mu diambu di khomba eto, bila tumona mbokolo zi muela andi mu thangu kabebombidila nkenda kudi beto, vayi tusiwa ko. Kiawu bila phasi zizidi va beto.»

²² Buna Lubeni wubavutudila: «Ndilukamba: “Kadi voleno masumu mu diambu di muana wawu.” Vayi lusiwa ko. Tala buabu menga mandi malombolo.»

²³ Vayi bawu basi zaba ko ti Yosefi wubawanga, bila mbangudi wuba va khati ka bawu.

²⁴ Buna Yosefi wubotuka va baba ayi wudila. Wuvutuka va baba ayi wumokana ayi bawu ayi wubonga va khati bawu Simeoni ayi wunkanga va meso mawu.

Bana ba Yakobi bavutuka ku Kanana

²⁵ Landila dio, Yosefi wuvana thumunu, ayi bawesa tsaku ziawu mu witi. Bafuiti phe vutula mbongo zi batu, mu tsaku yi witi yi mutu mutu ayi kubavana khuta mu diambu di nzila. Bobo babavangila.

²⁶ Bakumisa witi kiawu va mbata ziphunda ayi bayenda.

²⁷ Mu thangu wumosi mu bawu kazibula tsaku andi mu vana bidia kudi phunda va nkelo, wumona mbongo ziandi , tala ziba va ntu tsaku.

²⁸ Buna wukamba bakhomba ziandi zi babakala: «Bamvutudidi mbongo zami ayi zawu zazi buabu mu tsaku ami!» Buna ntima awu wulebakana, batalasana mu nzakumunu, bakamba: «Mambu mbi Nzambi katuvangidi?»

²⁹ Thangu batula kudi se diawu Yakobi ku Kanana, bankamba mambu mamo mababuidila, bakamba:

³⁰ «Mutu nio widi mfumu tsi beni wutufuemina, wutuba ti tuidi mineki mu tsi.

³¹ Tukamba kudi yandi: “Tuisi ko mineki vayi tuidi batu basonga.

³² Tuidi zikhomba kumi zole, bana ba se dimosi, khomba eto mosi wufua ayi nio wu tsuka wusiedi ku Kanana ayi se dieto.”

³³ Vayi mfumu tsi yoyo wutuvutudila ti wutia zaba ti tuidi batu basonga. “Bikeno wumosi mu beno ayi bongeno bidia mu diambudi makanda meno malembo fue nzala ayi yendeno.

³⁴ Ayi lundatina tsukeno yibakala, muingi ndizaba ti luisi ko mineki, vayi luidi batu basungama. Mandiluvutudila khomba eno wubakala ayi lulenda kita mu tsi.”»

³⁵ Ayi tala mayiza bua: Bu balembo sokumuni tsaku zawu, tala, ko ki mbongo ki mutu mutu kiba mu tsaku. Bamona, bawu ayi se diawu, biko biawu bi mbongo, buna bamona tsisi.

³⁶ Yakobi se diawu wubakamba: «Lukondosolo bana bole:Yosefi kasiedi ko ayi Simeoni kasiedi ko, ayi lueka kumbonga diaka Benyamini! Va minu mambu mama mamo mizidi!»

³⁷ Vayi Lubeni wukamba se diandi : «Buna vonda bami bole babakala ti ndikadi kumvutula. Wundiekudila niandi, mandikuvutudila niandi.»

³⁸ Vayi Yakobi wukamba: «Muana ami kalendi kulumuka neno ko, bila khomba andi wufua ayi niandi veka wusiala. Ti kisumbula ki mfuilu kizidi va yandi mu nzila, kue maluenda, buna mu kedika malukulumuna mu kiadi tsuki ziami ziphembe mu tsi bafua.»