1 Mose 41 - Bible en Kiyombe

Zindozi zi Falao

¹ Ayi diadi diyiza bua, mvu miole mimvimba bu mivioka, Falao wulota ndozi, ayi tala wutelama va ndambu nzadi yi nile.

² Ayi tala, mu nzadi mu totuka tsambudi di zingombi zi kitoko mu tala ayi zitola, ayi zitona dia biti bi nzadi Nile.

³ Ayi tala tsambudi zingombe zinkaka zitotuka mu nzadi nile ku mbusa awu, (zikambulu kitoko) ayi zikonda, ayi zitandama va ndambu zingombe zinkaka va simu nzadi Nile.

⁴ Buna zingombe ziba kadi kitoko mu tala ayi zikonda zitona dia tsambudi di zingombe ziba zi kitoko mu tala ayi zitola. Buna Falao wukotuka.

⁵ Vayi wubuela leka ayi wulota ndozi mu khumbu yinzole. Ayi tala ti tsambudi di bisaka bitotuka mu kiti kimosi, binene ayi bimbote.

⁶ Ayi tala tsambudi di bisaka bikonda ayi biyumusu kudi phemo yi ku ntotukilanga thangu bimena landila biawu.

⁷ Buna bisaka bikonda bitona mina tsambudi di bisaka bitola ayi bikomana. Buna Falao wukotuka, ayi tala yiba ndozi kuandi.

⁸ Ayi mu nsuka, pheve andi yiyamusu. Wutedisisa banganga zi minkisi zizio zi Ngipiti ayi batu bandi banduenga babo, ayi Falao wubakamba zindozi ziandi. Vayi kusi ba ko mutu mu kuzibangudila Falao.

⁹ Buna mfumu minuiki wukamba Falao buabu: «Mfumu, lumbu kiaki, thidi funguna masumu mami.

¹⁰ Falao wufuemina bisadi biandi. Wuthula mu buloko bu nzo mfumu yi minkebi, minu ayi mfumu nlambi mapha.

¹¹ Landila dio, tuloto beto babole ndozi, mu builu bu mosi, minu ayi niandi. Tulota mutu na yandi ndozi, kadika ndozi na yandi mbangudulu.

¹² Kuna kuba ayi beto, muana bakala muisi Ebeleo, kisadi ki mfumu minsungi. Bu tunkamba zindozi beni, wutubangudila ziawu. Mutu na mbangudulu boso bubela ndozi andi.

¹³ Ayi yiyiza ba, bu katubangudila zindozi beni bobo phe bubela. Minu, Falao wuphutula mu kisalu, vayi nina, wundengidika.»

Yosefi wubangula zindozi zi Falao

¹⁴ Buna Falao wutumisa Yosefi muingi bantotula mu buloko. Wukivuka, wuviakisa yunga biandi ayi wukota kudi Falao.

¹⁵ Buna Falao wukamba Yosefi: «Ndilotolo ndozi, vayi kuisi ko mbangudi. Vayi minu bakhembi mu diambu diaku ti zebi wa zindozi ayi kuzibangula.»

¹⁶ Vayi Yozefi wuvutudila Falao, wukamba: «Minuami ko ndilenda bangula yawu! Nzambi makakuvana tsundudulu yifueni.»

¹⁷ Falao wukamba diaka kudi Yosefi: «Mu ndozi ami, tala, ndiba wutelama va simu di nzadi Nile.

¹⁸ Ayi tala, mu nzadi Nile mutotuka tsambudi zingombe zikheto zitola ayi zi kitoko, ayi zitona dia biti bi nzadi Nile.

¹⁹ Ayi tala, tsambudi yinkaka yi zingombe zikheto zitotuka ku mbusa zina, zikonda, kheni ayi bivisi na bivisi. Nditekele mona ziphila yoyo mu Ngipiti ko.

²⁰ Zingombe zikheto ziba zikonda ayi zimbimbi batona dia tsambudi ngombe zikheto zitheti minsuni miawu.

²¹ Zingombe ziozio zikheto zikota mu bivumu biawu mu kambu zaba ti zikotidi mu bivumu biawu bila mbonokono awu yiba yimbimbi boso buyibela va theti. Buna ndikotuka ku tulu.

²² Landila momo, ndimona mu ndozi ami, ayi tala, tsambudi bisaka bimena mu kiti kimosi, biwala ayi bimbote.

²³ Ayi tala tsambudi ki bisaka biyuma, bikonda ayi biviku kudi phemo yiba ku ndambu ku ntotukilanga thangu bitona mena ku mbusa awu.

²⁴ Bisaka bikonda bitona mina tsambudi bisaka bimbote. Khembi mawu kudi banganga zi minkisi vayi kadi mutu kasi nunga ko vana mbangudulu.»

²⁵ Buna Yosefi wukamba Falao: «Zindozi zizole zi Falao zibeki mbangudulu yimosi. Diodio dikakuiza vangi wukikambidi diawu kudi Falao.

²⁶ Tsambudi zingombe zikheto zimbote yidi tsambudi mimvu. Bo buawu, tsambudi bisaka bimbote bidi tsambudi ki mimvu. Zindozi ziozio zi zole zi Falao zibeki mbangudulu yimosi kaka.

²⁷ Tsambudi ki zingombe zilebakana ayi zikonda zitotuka ku mbusa zina yidi tsambudi ki mimvu ayi tsambudi ki bisaka bikembo kadi kiasa, bivia mu phemo yiba ku ndambu yintotukilanga thangu mayiba tsambudi ki mimvu mi malema.

²⁸ Boso bukhembi Falao, Nzambi songidi kudi Falao ma makavanga.

²⁹ Makuba tsambudi ki mimvu ki mim'butu miphuele mu tsi yimvimba yi Ngipiti.

³⁰ Vayi, ku mbusa mimvu miomio, mvu tsambudi mi malema mamiza mu kedika, inga, belazimbakana mbongo yiphuele yi tsi Ngipiti ayi malema mamazinisa tsi.

³¹ Mbongo yiphuele yiteka ba mu tsi yilendi buela zabakana ko mu diambu di malema mankuiza, bila mamaba mangolo beni.

³² Ayi ti ndozi yivutukulu khumbu zole kudi Falao yidi diambu disiama kudi Nzambi ayi Nzambi makadivanga mu nsualu.

³³ Buabu, bika Faloa katomba bakala dimosi diluenga ayi didi nzayilu ayi kantula mfumu mu tsi Ngipiti.

³⁴ Bika falao kavanga diadi, bika kasola minkengi mu tsi ayi mu lutuadusu lu bakala diodio, minkengi mifuiti botulanga buku kintanu ki mim'butu mi tsi Ngipiti mu mvu tsambudi di mbuntu wuphuele.

³⁵ Ba kupika bimvukila bibio bi mvu miami mimio mi mbote milembo yizi, ayi mu lusadusu lu Falao, balunda mu zimbanza mbongo boso bimvukila, ayi bafuiti ku bitanina.

³⁶ Bimvukila beni bifuiti ba mu sadisa tsi mu tsambudi di mvu mi nzala minkuiza nabiu mu tsi, muingi tsi yibika manusu mu nzala.»

Yosefi mu kimfumu

³⁷ Diambu diodio dizolakana mu meso ma Falao ayi kudi bisadi biandi bibio.

³⁸ Buna Falao wukamba kudi bisadi biandi: «Kulenda bakana bakala dinkaka banga niandu, mu yandi mulenda ba pheve yi Nzambi?»

³⁹ Buna Falao wukamba Yosefi: «Nzambi bukakusongidi mamo mama, kuisi ko mutu widi phila nduenga ayi nzayilu phila mosi ayi ngeyo.

⁴⁰ Ngeyo ma wuba nkulutu mu nzo ami, ayi batu bami babo maba kutumamana mu kambu ku bangusa. Mu kundu ki kitinu kaka mandi kuviokila mu bunene.

⁴¹ Falao wukamba yosefi :" Tala: ndikutudidi mu kedika nkulutu mu tsi yiyo yi Ngipiti.»

⁴² Buna Falao wuvula nlunga andi mu koko kuandi ayi wutula wawu mu koko ku Yosefi, wumvuika minlele mi lino ayi wutula kiphambu ki wola va tsingu andi.

⁴³ Wunkumisa phe va kalu dinzole diba diandi, muingi baboka va ntuala andi: «Bika kavioka» Bobo Falao kantudila nyadi wu tsi yiyo yi Ngipiti.

⁴⁴ Falao wubuela kamba Yosefi: «Ndidi Falao, vayi kambu minsua miaku kuisi ko bakala lenda nanguna koko voti kulu mu tsi yiyo yi Ngipiti.»

⁴⁵ Mambu momo bu mavioka, Falao wutedila Yosefi mu zina di Tsafnati-Paneya ayi wumvana nketo Asinati muana nketo wu Potifeli, nganga muisi Oni. Buna Yosefi wutotuka mu tala tsi Ngipiti.

⁴⁶ Yosefi wuba mimvu makumi matatu mu thangu katelama va ntuala Falao, ntinu wu Ngipiti. Buna Yosefi wutotuka va ntuala Falao ayi wuzieta mu tsi yimvimba yi Ngipiti.

⁴⁷ Mu tsambudi di mimvu mi mbongo yi phuele, ntoto wusilembo ko buta mim'butu mi phuele.

⁴⁸ Ayi wukubika bimvukila bibio bi mvu tsambudi mi yiza mu tsi Ngipiti, ayi wutula bimvukila mu zimbanza. Bimvukila bi buala biba fika fika ayi mbanza, wutula bio va khati mbanza.

⁴⁹ Ayi Yosefi wuyonzika mbongo yiphuele, banga nienge wu mbu, nate , ku tsuka, balembana kuyitangikisa, bila yisi ba ko butangila.

⁵⁰ Tekila mvu malema miza, Yosefi wubutulu bana bole, bambutila Asinati muana nketo wu Potifela, nganga muisi Oni.

⁵¹ Yosefi wutedila muana wuthete wubutuka mu zina di Manase bila wukamba: «Nzambi wunzimbikisi phasi ziami zizio ayi mvambusu ami ayi batu bami.»

⁵² Ayi wutedila wunzole mu zina di Efalayimi, bila, wukamba: «Nzambi wuthudidi lubutu mu tsi yi ndiba mu kiadi.»

⁵³ Tsambudi ki mimvu mi mim'butu miphuele miba mu tsi mimana.

⁵⁴ Buna mvu tsambudi mi malema mitona kuiza boso bukamba Yosefi. Nzala yi ngolo yibua mu zitsi zizio, vayi mu tsi Ngipiti yiyo muba bidia.

⁵⁵ Ku tsuka, tsi yiyo yi Ngipiti yibua mu nzala ayi batu baboka kudi Falao mu diambu di dipha. Buna Falao wukamba basi Ngipiti babo: «Yemonikineno Yosefi. Vangeno mamo bakakulukamba.»

⁵⁶ Nzala yibua va ntoto wuwo. Buna Yosefi wuzibula zinzo zizio zi ndundila yi mbongo biba yawu ayi wutekisa witi kudi basi Ngipiti, bila nzala yiba yi ngolo mu tsi Ngipiti.

⁵⁷ Buna batu ba ntoto wuwo babekuizanga ku Ngipiti mu sumba witi kudi Yosefi bila nzala yiba yi ngolo va ntoto wuwo.